Максим Шацких АГМК устидан қозонилган ғалаба борасида ўз фикрлари билан ўртоқлашди

Ўзбекистон Суперлигаси 19-туридан ўрин олган АГМК - "Пахтакор" учрашувида меҳмонлар 2:0 ҳисобидаги муҳим ғалабани қўлга киритди. Беллашувдан сўнг ҳар иккала жамоа бош мураббийлари иштирокида матбуот анжумани бўлиб ўтди. Қуйида Максим Шацкихнинг фикрлари билан танишиб чиқишингиз мумкин. 

- Бугун икки етарли даражада кучли жамоалар майдонда тўп тепди. Иккала клуб ҳам чиройли ва комбинацион футбол намойиш этди. Илк таймда кўплаб вазиятлар яратдик, бироқ улардан фойдалана олмадик. Рақиб ҳам бизга жиддий қаршилик кўрсатди. Иккинчи бўлимни анча шиддат билан бошладик. Гол урганимиздан сўнг тартибли футбол намойиш этдик. Шунингдек, рақиб футболчисини ҳимояда хато қилишга мажбур қилганимизни ҳам алоҳида таъкидлаб ўтиш керак. Охир-оқибат иккинчи голни ҳам рақиб дарвозасига киритдик. 

- Бизнинг ҳар бир ўйинимиз худди финалдек. Шу туфайли мен йигитларни охирги бор майдонга тушаётгандек тайёрлайман. Энди бироз дам олиб, ҳал қилувчи беллашувларга тайёргарликни давом эттирамиз. Кимдир терма жамоага кетади, яна кимдир клубда қолади. 

Рақиб хатолари эвазига урилган голлар ҳақида 

- Рақибни хато қилишга биз мажбур қилдик. Шу сабабдан голлар вужудга келди. Бундай босимдан сўнг эрта ёки кеч кимдир хато қилади. Энг муҳими, биз яхши ўйин кўрсатиб, ғалаба қозондик. 

"Пахтакор" футболчиларига тиббий ёрдам кўп кўрсатилгани борасида

- Тўғриси, бунга эътибор берганим йўқ. Йигитларнинг жисмоний ҳолати жуда яхши. Уларга тиббий ёрдам кўрсатилиги айнан ўша эпизодлар билан боғлиқ. Бугун томошабоп футбол ўйнадик ва ўйлашимча, мухлислар хурсанд. 

3 та ҳимоя билан "шерлар" яхши ҳаракат қилмоқда. Мавсумнинг қолган учрашувларида ҳам шу услубда ҳаракатланиш яхши эмасми? 

- Кўрамиз, нега энди йўқ. Биринчи бўлимда ёки танаффусдан сўнг бўлса ҳам ушбу тактикада ўйнай оламиз. Одатда, рақибга қараб тактика танлаймиз. Футболчиларим ҳар қандай ҳолатда бунга тайёр. Бу биз учун муаммо эмас. Ҳозирча кичик пауза. Кейинги турларда қандай услубда ҳаракат қилишимиз борасида қарор қабул қиламиз.