Ўзбек футболининг ёрқин юлдузларидан бири бўлган Максим Шацких ҳозирда Россия премьер-лигасида “Ротор” клубида бош мураббий Александр Хацкевичга яқиндан ёрдам бериб келмоқда.

Шацкихнинг ҳам ўзбек футболига оид билдирадиган фикрлари одатда барчамиз учун қизиқарли туюлади. Аммо у камгап ва доим ҳам матбуотда кўриниш беришни хушлайвермайди. Шунга қарамай, Максим Александрович ўзбекистонлик журналистларнинг раъйини қайтармасликка ҳаракат қилади. Аммо ҳозирда унинг иши роса кўп, чунки Россия чемпионати бошланган ва “Ротор”да ҳам иш жуда қизғин. Вақти тиғизлигага қарамай, айрим саволларга қисқача жавоб йўллади.

-  “Ростов”да тўп сураётган ҳамюртимиз Элдор Шомуродовни кузатиб бораётгандирсиз. Сизнингча, унинг гол урмай қўйгани нима билан боғлиқ?

-  Ҳа, албатта кузатиб боряпман. Лекин шуни унутмаслик жоизки, ҳар бир учрашувда рақиб дарвозасини ишғол қила оладиган ҳужумчининг ўзи йўқ. Боз устига у кучли чемпионат ўйнаяпти. Шундай экан, бундай паллада ҳар доим вақт керак бўлади.

-  Охирги пайтларда ўзбекистонлик футболчилар россияликларнинг эътиборини тортмоқда. Масалан, Остон Ўрунов “Уфа”дан “Спартак”ка ўтди, 18 ёшли Жасур Жалолиддинов эса “Локомотив” билан шартнома тузди. Сизни ҳам бундай воқеликлар бефарқ қолдирмаётганига ишонамиз...

-  Тўғри. Уларни кузатиш қизиқарли. Лекин барчасини шубҳасиз вақт кўрсатади. Яна шуни алоҳида айтмоқчиманки, бу ҳолат улар учун ҳам, Ўзбекистон термаси учун ҳам катта плюс.

-  Айни пайтда “Ротор”да ишлаётганингиздан хабардормиз. Аммо яқинда мураббийлар штабини клубдан кетиши ҳақида ҳам гап-сўзлар чиққанди...

-  Клубдаги ишларимиз жойида, ҳаммаси зўр. Фақат газеталарни камроқ ўқинг!

-  Мураббийликка жиддий киришганингиздан хурсандмиз. Вақти келиб, чемпионатимизда ишлаш ниятингиз ҳам борми?

-  Агар шу масалада таклифлар бўладиган бўлса, у ҳолда буни ўйлаб кўраман, албатта.