Максим Шацких: Ёшларга вақт керак

Суперлиганинг 11-туридан ўрин олган "Пахтакор" - "Навбаҳор" учрашувида томонлар дурангга имзо чекди. 

Ўйинда бир нечта вазиятлар бўлишига қарамасдан дарвозалар ишғол қилинмади. 

Шу тариқа, наманганликлар турнир жадвалида иккинчи, "Пахтакор" эса 6-ўринга жойлашди. 

Мазкур учрашувдан сўнг ҳар икки жамоа бош мураббийлари иштирокида матбуот анжумани бўлиб ўтди. Марҳамат, танишиб чиқишингиз мумкин: 

- Биринчи навбатда айтадиган бўлсак, мухлисларга ўйин ёқди. Очиқ футбол гувоҳи бўлдик ва ҳужумларга ҳужум билан жавоб берилди. Умуман олганда, учрашув ҳаммага ёқди. Барча йигитларга кўрсатган ўйини учун раҳмат айтаман. Бизни осон бўлмаган беллашувлар кутиб турибди. Аста-секин кейинги уларга тайёргарлик кўрамиз. 

- "Пахтакор" кучли жамоаларга қарши ишончли ўйин кўрсатмоқда, аммо кўп очко йўқотяпти. Бунинг сири нимада?

- Биз шунчаки ўз ўйинимизни намойиш этяпмиз ва сифатлироқ футбол кўрсатишга ҳаракат қиляпмиз. Футболчилар ва мураббийлар штаби ўз ишини кўрсатишга уринмоқда. Тўғри, бизда захира ўриндиғи кенг эмас. Шундай бўлса-да, йигитлар эшитяпти ва режа бўйича ҳаракат қиляпти. Шундай экан, қадамма-қадам тўғри йўналишда ҳаракат қиламиз. Афсуски, ёшларга вақт керак. Умуман олганда, ҳаммага вақт керак.