"Манчестер Сити" ҳимоячиси Хусанов билан бирга ўйнаш қандай эканини айтди

Англия Лига кубогининг ярим финал босқичидан ўрин олган учрашувда "Манчестер Сити" сафарда "Ньюкасл"ни 2:0 ҳисобида мағлуб этди. Баҳсдан сўнг "шаҳарликлар" ҳимоячиси Макс Аллейн Абдуқодир Ҳусанов билан жуфтликда ҳаракат қилаётгани ҳақида фикр билдирди.

"Жамоадан жуда фахрланаман. Хусанов билан яхши алоқа ўрнатиб улгурдик, у билан бирга ўйнаш жуда ёқимли. Келгусида ҳам бирга кўп ўйнашни интиқлик билан кутяпман.

Осон бўлмади. Менимча, энг асосийси — футболга тўлиқ эътибор қаратиш ва бошқа чалғитувчи омилларни четга суриш.

"Ньюкасл" жисмонан кучли ва қийин жамоа. Стадион жуда шовқинли, бу ерга келиш осон эмас. Аммо ўйиндан катта завқ олдим", — деди Аллейн.

Маълумот учун, ушбу баҳсда ўзбекистонлик ҳимоячи Абдуқодир асосий таркибда майдонга тушиб, тўлиқ 90 дақиқа ҳаракат қилди. Унинг ўйини Sofascore томонидан 8,1 баллга лойиқ кўрилди ва у учрашувнинг энг яхши футболчиси деб топилди.