“Манчестер Сити” Ҳусанов ўйнайдиган қанотга янги ҳимоячи топди

“Манчестер Сити” раҳбарияти жамоанинг ўнг қанот ҳимоясига барибир янги ижрочи олиш керак, деган хулосага қайтди. Айни пайтда клуб скаутлар бир неча номзодни кузатув остига олган.

Хусусан, “Брентфорд” нинг ўнг қанот ҳимоячиси Микаэль Кайоде ҳам “шаҳарликлар” нишонида турибди. Манчестерликлар 21 ёшли футболчининг ҳимоядаги хотиржамлиги ва ҳужумга қўшилиш маҳоратидан жуда катта таассурот олган. Бу ҳақда Caught Offside хабар берди.

Манбага кўра, италиялик ўйинчига “Бавария”, “Ювентус” ва “Интер” ҳам қизиқиш билдирмоқда. Агар қишки трансфер ойнасида расмий таклиф тушса, “Брентфорд” Кайоде учун 35–40 миллион евро талаб қилади.

Таъкидланишича, келаси ёзда ҳимоячининг нархи яна ошиб кетиши мумкин.

Жорий мавсумда Кайоде барча мусобақаларда 25 та ўйин ўтказди. Унинг клуб билан шартномаси 2030 йилнинг ёзигача амал қилади. Transfermarkt маълумотларига кўра, футболчининг бозор қиймати 20 миллион еврони ташкил қилмоқда.