“Манчестер Сити”да ўйнаган футболчи болалари билан бир ўлимдан қолди

“Манчестер Сити” клубида ўйнаган Аргентина терма жамоасининг собиқ футболчиси Мартин Демикелис уч нафар фарзанди билан сёрфинг билан шуғулланаётган вақтида ҳалок бўлишига оз қолди.

Ҳодиса Атлантика соҳилларидаги машҳур Уругвай курорти  Пунта-дель-Эсте яқинида содир бўлди, деб хабар беради The Sun.

Собиқ футболчи болалари билан сувга шўнғиган вақтида қутқарувчилар постидан тахминан 400 метр узоқда бўлган. Бу ҳудуд сузиш учун мўлжалланмаган бўлиб, хавфли жой ҳисобланади. Кучли оқим Демикелис ва унинг болаларини соҳилдан узоқлаштириб кетган.

Бироқ шу пайт тасодифан иш вақтидан ташқари сёрфингда учиш учун келган икки нафар қутқарувчи уларни кўриб қолади ва ўз вақтида ёрдам кўрсатади. Шу тариқа, муҳиш воқеанинг олди олинади.

Футболчи сифатида Демикелис “Бавария”, “Малага” ва “Манчестер Сити” клубларида тўп сурган. Аргентина терма жамоаси сафида эса у 51 та ўйин ўтказиб, икки марта гол урган.