"Манчестер Сити"нинг ёш футболчиси университетда ўқиш учун футболдан кетди

"Манчестер Сити" академияси аъзоси Хон Вилхофт-Кинг футболчилик фаолиятини якунлаб, Оксфорд университетида ҳуқуқ бўйича таълим олишни танлади. Бу ҳақда The Guardian хабар берди.

У 6 ёшида "Тоттенхэм" академиясига қўшилган, кейинчалик Англиянинг U-16 терма жамоасида ҳам ўйнаган. Ўтган мавсумда у "Манчестер Сити" билан шартнома имзолаб, U-21 жамоасида тўп сурган ва ҳатто асосий таркиб машғулотларида ҳам қатнашган. Вилхофт-Кинг ўз қарори ҳақида шундай деди:

"Менда футболда мотивация доимо етишмас эди. Футболни яхши кўрардим, аммо жароҳатлар ўз таъсирини ўтказди. Ақлий жиҳатдан ўзимни янада юқори даражада синаб кўришни истаганимни ҳис қилдим."