Ўлгани эълон қилинган футболчи моргдан тирик чиқди

Нигериянинг “Катсина Юнайтед” клуби ҳимоячиси Чинеду Озора моргда ҳаёт аломатларини кўрсатиб, шифохонага олиб кетилди. Бу ҳақда The Sun нашри хабар берди.

Қайд этилишича, Озор “Нигер Торнадос”га қарши мавсумолди ўйини вақтида ҳушидан кетган. Шифокорлар футболчини текшириб, уни вафот этган, деб хулоса қилишган. Бироқ кейинроқ моргда футболчи қўлини қимирлатиб, ҳаёт аломатларини кўрсатган.

Нигериялик футболчи зудлик билан реанимация бўлимига олиб кетилган. Ҳозир шифокорлар уни реанимация қилиш ва аҳволини барқарорлаштиришга ҳаракат қилмоқда.

Бунга қадар клуб Озорнинг оиласи ва яқинларига ҳамдардлик билдирган эди.

Озор 27 ёшда. У июль ойида Нигерия олий дивизионида иштирок этувчи “Катсина Юнайтед” клубига ўтган. Ўтган мавсумда у Нигерия чемпионатида 15 та учрашувда майдонга тушган ва самарали ҳаракатларни амалга оширмаган.