“Манчестер Юнайтед” бу гал шошилмайди!

Ёзда “Боруссия” етакчиси Жейдон Санчони трансфер қилишга жуда яқин келган “Манчестер Юнайтед” раҳбарияти бу гал шошилмоқчи эмас. Ўтган йили дортмундликлар инглиз футболчининг нархини 108 миллион фунтга баҳолаб, манчестерликларнинг шу суммани бўлиб тўлаш таклифини қабул қилмаган эди.

“Манчестер Юнайтед” хўжайинлари айни пайтда “Боруссия” ўз позициясини ўзгартиради, деган фикрда. Шу боис, манчестерликлар мавсум якунланишини кутади. Футболчининг шартномаси 2023 йилнинг ёзида тугайди ва уни ўз вақтида сотиб юбормаслик, дортмундликларнинг зарарига ишлаши мумкин.

Маълумотларга қараганда, “Манчестер Юнайтед” бу гал футболчи учун 50 миллион фунт ажратган. Бу трансфернинг амалга ошишида асосий омил Санчонинг Англияга қайтиш истаги бўлиши керак. Сульшер жамоаси агар Жейдон шуни истаса, дортмундликларни таклиф қилинаётган нархга уни қўйиб юборишга кўндиришига ишонмоқда.

Шунингдек, Бундеслигада бешинчи ўринни эгаллаб турган “Боруссия” мавсум охирида Европа Чемпионлар лигаси йўлланмасидан қуруқ қолса, “Манчестер Юнайтед”нинг иши осонлашади.

Санчо жорий мавсумда Германия чемпионатида 21 та учрашувда майдонга тушиб, олтита гол уришга эришди.