"Манчестер Юнайтед" Эрик тен Хаг билан омадсизликка учрайди. Бунга етарлича сабаб бор!

"Қизил иблислар" Почеттино, Энрике, Лопетеги сингари мураббийлар орасидан нидерландиялик мутахассисни танлади. Ном жиҳатидан юқорида номи келтирилган мураббийилар бир қадам олдинда бўлиши мумкин, аммо келажак учун Эрик варианти идеал кўринди. Унинг бошқарувидаги "Аякс" голларни қалаштириб ташлаётганига қарамай, Эредевизи кучли бешликка кирмайди. Аслида, "Манчестер Юнайтед"ни ҳозир ким бошқариши муҳим эмас, у барибир омадсизликка учрайверади. Клуб раҳбарияти ўзгармас экан, яқин 5 йил ичида жамоа постида ким бўлиши аҳамият касб этмай қолади. Ўринли савол туғилади. Нега?

Сэр Алекс Фергюсондан сўнг клуб бошқарувида фақат кучли мураббийлар ишлади. Шотландиялик мутахассиснинг издоши Дэвид Мойес, футбол профессори Луи ван Гал, исми совринлар билан синоним бўлган Жозе Моуриньо, харизмаси билан ҳаммани лол этган Сульшер... Уларнинг ҳар бири жамоавий ўйин қура олди ва бир қарашда "Юнайтед"ни кучайтиргандек туюлди. Якунда эса, омадсизлик.

"Қизил иблислар" раҳбарлари ўз хатоларини англаши ва ишни тўғри йўлга қўйиши учун етарли вақтга эга эди. Афсуски, қилинган хатолардан хулоса чиқарилмади. Буни оддий мухлис сезмаслиги мумкин, бироқ кучли мураббийларнинг бирортаси Манчестерга кўчиб ўтмаслиги рост. Клопп, Гвардиола ёки Нагельсманн пулга кўмиб ташлашса ҳам бошқарув модели ўзгармаса, "Олд Траффорд"га келмаслиги факт!

Кескин фикрлари билан ҳеч кимни аямайдиган Луи ван Гал ватандошини мавсум сўнгида "Туманли альбион"га боришини эшитгач, шундай фикр билдирди:

"Афсус, у футбол жамоасида фаолиятини давом эттиришини истаган эдим. Эрик футбол эмас, бизнес клуби билан шартнома имзолабди".

Дарҳақиқат, сўнгги йилларда жамоанинг асосий таркибини шакллантириш, сифатли трансфер, ғоя асосидаги бошқарув ва бошқа элементларнинг йўқлиги МЮни тобора инглиз грандларидан савия борасида ортда қолишига олиб келмоқда. Жамоа музейига сўнгги бор Моуриньо 2017 йилда Европа лигаси совринини туҳфа этганди.
Ван Галнинг сўзларида жон бор. Эд Вудворднинг режалари иш бергани боис, "Манчестер Юнайтед" катта даромад олишда давом этмоқда. "Олд Траффорд" эгалари натижалар ёмонлашаётганига қарамай, ҳар йили улкан даромадни қўлга киритишда давом этмоқда. Мухлислар учун эса, бунинг умуман қизиғи йўқ. Уларга ишончли футбол кўрсатадиган, ўзи иштирок этадиган мусобақаларда фақат чемпионлик учун кураш олиб борадиган жамоа керак. Айниқса, ҳамшаҳарлари фонида бугунги "Юнайтед" муаммолар ўчоғига тушиб қолгани яққол кўзга ташланади.

Кардинал ўзгаришлар қилиш учун "Ливерпуль"дан қақшатқич мағлубият қабул қилиб олишни кутиш шартмиди? Раҳбарият азалий рақибидан "тарсаки егач", мухлисларини тинчлантириш мақсадида шошилинч қарор қабул қилди. Шу тариқа, клуб ўз акциялари нархининг жаҳон бозорида тушиб кетмаслигини таъминлади, аммо бу қай даражада тўғри қарор? Бизнес лойиҳа сифатида бу ечим шунчаки супер натижа берди. Жамоа ўйинида-чи? Тен Хаг бу - таваккал қарор. Катта клубларда ишламаган, юлдузлар билан елкама-елка турмаган мутахассис клубдаги тўполонни қандай бостириши мумкинлиги савол остида қолмоқда. Шунга қарамай, яхши янгиликлар ҳам йўқ эмас. Эрик жуда сабрли инсон. Унинг келаётганини эшитгач, таркибда кўплаб юлдузлар хотиржам бўлгани бежиз эмас. Нидерландиялик мураббий музокаралар чоғида ўзига ишонч кредитлари беришни талаб қилди. Натижада, томонлар кейинчалик чўздириш шарти билан 3 йиллик шартномага имзо чекди. Буниси муҳим эмас. Асосийси, "Манчестер Юнайтед" ўз ваъдасини қай даражада вафо қилади? Тен Хагга зўр таркиб қолди, деб бўлмайди. Мотивациясиз ҳаракат қиладиган ва даражаси "топ"дан узоқлашиб кетган йигитлар! Қўшимчасига, инжиқлашиб бораётган 37 ёшли Криштиану Роналду.

Раҳбарият мураббий ниманидир ўзгартиришини истаса, унинг ҳамма илтимосларини қаноатлантириши шарт. Хендерсон оёқда де Хеядан яхши ўйнайдими, демак, у асосий посбон. Магуайр ҳужум бошлашда пассивми, демак у сотиб юборилади! Роналду кўрпани ўзига тортяптими, демак, унинг кетадиган пайти бўлибди! Агар футболчи ва мураббий ўртасида келишмовчилик юзага келса, клуб Эрик томон бўлиши керак. Футболга ўз қараши бор, жуда катта маош оладиган супер юлдузлар қуршовида тен Хагни қўллаб-қувватламаслик, уни йиртқичлар тўла қафасга қуролсиз киргизиб юборишдек гап.

Агар МЮ "Сити" сингари тизимли супер клубга айланишни истаса, энди барча ваколатни янги мураббийга топшириши керак. Трансферлар, футболчиларнинг шартномалари, янги келадиган ижрочилар, ким жамоани тарк этиши ва барча-барчаси энди Эрикнинг қўл остига ўтиши лозим. Ҳудди бир пайтлар Сэр Алекс бошқарувни ўз қўлига олгани сингари. Акс ҳолда, клуб яна бир иқтидорли мураббийни "синдириб ташлаши" мумкин!

Яҳёхўжа Улуғхўжаев