"Манчестер Юнайтед" Фергюсон кетганидан кейин компенсацияларга қарийб 100 млн фунт сарфлади

"Манчестер Юнайтед" клуби Сэр Алекс Фергюсон жамоани тарк этганидан кейин мураббийлар ва раҳбарият аъзоларига тўланган компенсациялар учун қарийб 100 миллион фунт сарфлади.

Душанба куни МЮ Рубен Аморимни бош мураббийлик лавозимидан озод қилди. "The Telegraph" нашрининг хабарига кўра, шартномаси тугашига бир ярим йил қолган португалиялик мутахассис 10 миллион фунт миқдорида компенсация олади.

Шу тариқа, 2013 йилда Фергюсон кетганидан кейин "Манчестер Юнайтед" ишдан бўшатилган мураббийлар ва уларнинг штабларига жами 78 миллион фунт компенсация тўлаган. Хусусан, Дэвид Мойесга 4,9 миллион фунт, Луи ван Галга 8,4 миллион фунт, Жозе Моуриньюга 19,6 миллион фунт, Оле-Гуннар Сульшерга 10 миллион фунт, Ральф Рангникка 14,7 миллион фунт ва Эрик тен Хагга 10 миллион фунт тўланган.

Бундан ташқари, МЮ мураббийларни тайинлаш, шунингдек, клуб директорларини ишга олиш ва ишдан бўшатиш билан боғлиқ жараёнлар учун тахминан 21 миллион фунт сарфлаган. Энг катта компенсация эса 2024 йилда Аморимни тайинлаш учун "Спортинг" клубига тўланган 11 миллион евро бўлди.