"Манчестер Юнайтед" ҳужумчиси "Евро-2020"ни ўтказиб юборади

“Манчестер Юнайтед” ҳужумчиси Мэйсон Гринвуд “Евро-2020”да Англия терма жамоасига ёрдам беролмайди. Бу ҳақда Англия терма жамоасининг твиттердаги расмий саҳифасида хабар берилди.

Юқоридаги манбага кўра, 19 ёшли футболчи узоқ муддатдан буён уни қийнаб келаётган жароҳат туфайли терма жамоада ўйнай олмайди.

Таъкидлаш керакки, Мэйсон инглизларнинг Европа чемпионатига борадиган дастлабки таркибида бор эди.

Гринвуд якунланган мавсум Англия премьер-лигасида жами 31 та ўйинда иштирок этди. У ушбу учрашувларда ўз ҳисобига 7 та гол ёздириб қўйишга эришди.

Англия терма жамоаси “Евро-2020”нинг “D” гуруҳида Хорватия, Чехия ва Шотландия терма жамоаларига қарши баҳс олиб боради.