"Манчестер Юнайтед" Онанани Португалия терма жамоаси аъзосига алмашмоқчи

"Манчестер Юнайтед" Диогу Коштани "Порту"дан сотиб олиб, Андре Онанани алмаштириш вариантини кўриб чиқмоқда.

"Correio da Manha" нашрининг хабарига кўра, манкунианликлардан ташқари футболчига бошқа бир Манчестер клуби – "Сити" ҳам қизиқиш билдирмоқда.

Жорий мавсумда Кошда барча мусобақаларда 41 та ўйинда майдонга тушиб, 44 та гол ўтказиб юборган. Шунингдек, у 18 та ўйинда дарвозани "қуруқ" сақлашга муваффақ бўлган.

Диогунинг "Порту" билан амалдаги шартномаси 2027-йилнинг 30-июнига қадар мўлжалланган. Унинг трансфер қиймати 38 миллион еврога баҳоланмоқда.

Эслатиб ўтамиз, Онана Европа Лигаси чорак финалининг биринчи ўйинидан сўнг асосий таркибдаги ўрнини йўқота бошлади. "Лион"га қарши 2:2 ҳисобида якунланган учрашувда у иккита қўпол хатога йўл қўйиб, голлар ўтишига сабаб бўлди. Гарчи бош мураббий Рубен Аморим оммавий тарзда уни қўллаб-қувватлаган бўлса-да, Онана вақтинча захирага туширилган.