“Манчестер Юнайтед” Роналдуни судга беради

“Манчестер Юнайтед” ўз ҳужумчиси Криштиану Роналду устидан судга даъво аризасини киритишга тайёр. Бу ҳақда ESPN нашри хабар тарқатди.

Манбанинг таъкидлашича, аслида клуб раҳбариятининг судга мурожаат қилиш нияти йўқ, лекин футболчи шартномани бадалсиз бекор қилишдан бош тортса, иш судьялар ҳукмига ҳавола қилинади.

Клуб мутасаддилари жаҳон чемпионатидан кейин португалиялик футболчининг Манчестерга қайтиб келишини истамаяпти. Бош мураббий Эрик тен Хаг ҳам бундан буён Роналду билан ишлашни хоҳламаслигини билдирган.

Роналду таниқли журналист Пирс Морганга берган интервьюсида клубни ва бош мураббийни кескин танқид қилганидан кейин ўзи шундоқ ҳам мураккаб бўлган муносабатлар тамоман бузилди.