“Манчестер Юнайтед”нинг трансфер режаси танқид остида қолди. Клуб асосий муаммога эътибор қаратиши керак

“Манчестер Юнайтед” ёзги трансфер ойнасида таркибини кучайтиришни режалаштирар экан, асосий эътибор ярим ҳимоя чизиғига қаратилиши кутилмоқда. Бироқ мутахассислар фикрича, жамоанинг ҳақиқий муаммоларидан бири — қанот ҳимояси ҳам эътибордан четда қолмаслиги керак.

Мураббий Майкл Кэррик қўл остида жамоа ижобий натижалар қайд этмоқда. У Люк Шоу ва Диогу Далотни ўз позицияларида ўйнатиб, 9 ўйинда 7 ғалаба, 1 дуранг ва 1 мағлубият қайд этди.

Шунга қарамай, айнан шу икки футболчи мухлислар томонидан энг кўп танқид қилинаётган ўйинчилар бўлиб қолмоқда. Кўпчилик уларнинг камчиликлари жамоанинг янада юқори даражага чиқишига тўсқинлик қилаётганини таъкидламоқда.

Ёзги трансфер ойнасида клуб Каземиро ўрнини тўлдириш ва Кристиан Эриксен кетишидан ҳосил бўлган бўшлиқни ёпишни асосий вазифа деб билмоқда. Шу билан бирга, спорт директори Жейсон Уилкокс ва скаутлар бўлими раҳбари Кристофер Вивелл янги трансферлар устида ишламоқда.

Мутахассислар фикрича, агар жамоа ярим ҳимояни кучайтириб, аммо қанот ҳимоясидаги муаммоларни ҳал қилмаса, кутилган натижага эриша олмайди.

Сўнгги 12 йил ичида клуб қанот ҳимоячиларига атиги 150 миллион фунт сарфлаган. Таққослаш учун, "Манчестер Сити" 2017 йилнинг ўзида уч нафар қанот ҳимоячиси учун 127 миллион фунт сарфлаган.

Люк Шоу узоқ йиллардан бери жамоада барқарор ўйин кўрсатиб келаётганига қарамай, унинг ҳужумдаги самарадорлиги пасайган. Жорий мавсумда у энг кўп ўйин дақиқаларини ўтказган футболчи бўлса-да, атиги битта голга ҳисса қўшган.

Диогу Далот эса жисмоний жиҳатдан яхши кўрсаткичларга эга бўлса-да, ўйинда барқарорлик ва тўғри қарор қабул қилиш борасида камчиликларга йўл қўйиб келмоқда.

Шунингдек, клуб ўз вақтида ёш истеъдод Альваро Каррерасни қўлдан бой бергани ҳам танқид қилинмоқда. У дастлаб арзон нархда сотилиб, кейинчалик юқори трансфер суммаси эвазига бошқа топ-клубга ўтган.

Трансфер бозори мураккаб бўлса-да, вариантлар етарли. Масалан, Льюис Холл ва Тино Ливраменто каби футболчилар юқори даражадаги вариантлар сифатида кўрилмоқда. Шунингдек, Педро Порро ёки Ола Айна каби тажрибали футболчилар ҳам муқобил вариант бўлиши мумкин.

Қобулов Наврўз