“Manchester Yunayted”ning transfer rejasi tanqid ostida qoldi. Klub asosiy muammoga e’tibor qaratishi kerak

“Manchester Yunayted” yozgi transfer oynasida tarkibini kuchaytirishni rejalashtirar ekan, asosiy e'tibor yarim himoya chizig'iga qaratilishi kutilmoqda. Biroq mutaxassislar fikricha, jamoaning haqiqiy muammolaridan biri — qanot himoyasi ham e'tibordan chetda qolmasligi kerak.

Murabbiy Maykl Kerrik qo'l ostida jamoa ijobiy natijalar qayd etmoqda. U Lyuk Shou va Diogu Dalotni o'z pozitsiyalarida o'ynatib, 9 o'yinda 7 g'alaba, 1 durang va 1 mag'lubiyat qayd etdi.

Shunga qaramay, aynan shu ikki futbolchi muxlislar tomonidan eng ko'p tanqid qilinayotgan o'yinchilar bo'lib qolmoqda. Ko'pchilik ularning kamchiliklari jamoaning yanada yuqori darajaga chiqishiga to'sqinlik qilayotganini ta'kidlamoqda.

Yozgi transfer oynasida klub Kazemiro o'rnini to'ldirish va Kristian Eriksen ketishidan hosil bo'lgan bo'shliqni yopishni asosiy vazifa deb bilmoqda. Shu bilan birga, sport direktori Jeyson Uilkoks va skautlar bo'limi rahbari Kristofer Vivell yangi transferlar ustida ishlamoqda.

Mutaxassislar fikricha, agar jamoa yarim himoyani kuchaytirib, ammo qanot himoyasidagi muammolarni hal qilmasa, kutilgan natijaga erisha olmaydi.

So'nggi 12 yil ichida klub qanot himoyachilariga atigi 150 million funt sarflagan. Taqqoslash uchun, "Manchester Siti" 2017 yilning o'zida uch nafar qanot himoyachisi uchun 127 million funt sarflagan.

Lyuk Shou uzoq yillardan beri jamoada barqaror o'yin ko'rsatib kelayotganiga qaramay, uning hujumdagi samaradorligi pasaygan. Joriy mavsumda u eng ko'p o'yin daqiqalarini o'tkazgan futbolchi bo'lsa-da, atigi bitta golga hissa qo'shgan.

Diogu Dalot esa jismoniy jihatdan yaxshi ko'rsatkichlarga ega bo'lsa-da, o'yinda barqarorlik va to'g'ri qaror qabul qilish borasida kamchiliklarga yo'l qo'yib kelmoqda.

Shuningdek, klub o'z vaqtida yosh iste'dod Alvaro Karrerani qo'ldan boy bergani ham tanqid qilinmoqda. U dastlab arzon narxda sotilib, keyinchalik yuqori transfer summasi evaziga boshqa top-klubga o'tgan.

Transfer bozori murakkab bo'lsa-da, variantlar yetarli. Masalan, Lyuis Xoll va Tino Livramento kabi futbolchilar yuqori darajadagi variantlar sifatida ko'rilmoqda. Shuningdek, Pedro Porro yoki Ola Ayna kabi tajribali futbolchilar ham muqobil variant bo'lishi mumkin.

Qobulov Navro'z