Манчестерликлар ҳужумни кучайтириш учун ПСЖ юлдузини сотиб олишмоқчи

“Қизил иблислар” ҳужум чизиғини янада кучайтириш мақсадида ПСЖ вингери Хвича Кварацхелияга қизиқиш билдирмоқда. Собиқ ҳимоячи Паул Паркер фикрича, грузиялик футболчи жамоага келадиган бўлса, бу “қизил иблислар” учун жуда фойдали трансфер бўлиши мумкин. Бу ҳақда Goal.com нашри хабар берди.

“Манчестер Юнайтед” 2025 йил ёзида ҳужумни кучайтириш учун катта маблағ сарфлаган эди. Клуб “Вулверхэмптон”дан Матеус Куньяни 62,5 миллион фунт эвазига, “Брентфорд”дан эса Брайн Мбеумони 65 миллион фунтга сотиб олган.

Мбеумо жорий мавсумда 10 гол ва 3 ассист қайд этган бўлса, Кунья 6 гол ва 2 ассист билан жамоага ёрдам бермоқда. Шу билан бирга, ҳужумчи Беньямин Шешко ҳам сўнгги ўйинларда яхши форма кўрсатиб, 9 ўйинда 7 гол урди.

Паул Паркернинг айтишича, Кварацхелия чап қанотда Куньяга қараганда кўпроқ сифат ва хавф олиб келиши мумкин.

“У ажойиб футболчи ва “Манчестер Юнайтед” учун жуда яхши трансфер бўларди. У жуда меҳнаткаш ва қанотда жамоага кўпроқ фойда олиб келади”, — деди Паркер.

Шу билан бирга, трансфернинг амалга ошиши осон бўлмаслиги ҳам айтилмоқда.

Кварацхелия 2025 йил январида “Наполи”дан ПСЖга 70 миллион евро эвазига ўтган. Ўшандан бери у клуб билан Лига 1, УЕФА Чемпионлар лигаси ва УЕФА Суперкубогини қўлга киритди. Грузиялик футболчи Париж клуби сафида 67 ўйинда 19 гол уришга эришган.

Футболчининг ўзи эса яқинда Парижда ўзини жуда яхши ҳис қилаётганини айтган эди.

Агар “Манчестер Юнайтед” Кварацхелияни сотиб олмоқчи бўлса, трансфер жуда қимматга тушиши мумкин. Чунки ПСЖ уни катта маблағ эвазига сотиб олган ва футболчини осонликча қўйиб юбормайди. Европанинг бошқа топ-клублари ҳам унга қизиқиш билдириши эҳтимоли юқори.

Қобулов Навруз