"Мақсад бўлмаса бу ишга бормасдим, "Насаф" ўйин бўйича ҳаммадан кучлироқ" - сиз яхши билган Баҳром Ҳакимов эътиборини нимага қаратган?

Ўзбек футбол мухлисларига яхши таниш бўлган қўқонлик Баҳром Ҳакимов бутун ҳаётини футболга бағишлади. Мураббий сифатида бир қанча клубларда ишлади, муваффақиятлар қозонди. Айниқса, Қаршининг “Насаф” жамоаси билан Осиё майдонларида ва ўзимизнинг чемпионатда эслаб қолишга арзийдиган натижаларни кўрсатди. Ундан кейин эса шогирдлари бу ишни давом эттириб келишмоқда.

Баҳром Ҳакимов айни пайтда “Турон” U-19 жамоасини бошқариб келяпти. Клуб раҳбарияти мутахассиснинг тажрибасидан айнан ёшлар билан ишлаш йўналишида фойдаланмоқда. Куни кеча унинг жамоаси U-19 чемпионати доирасида “Андижон” ёшлари билан баҳс олиб борди. Учрашувдан кейин Ҳакимовни суҳбатга тортдик.

“Турон”даги вазифаси

- Мақсад бўлмаса бу ишга бормасдим. Бизда U-19, U-16, U-14 жамоалари бор. Шуларга қараяпман ва қолаверса, U-19 жамоасини бошқаряпман. Бизнинг вазифамиз маҳаллий ёшларимизни “Турон”ни асосий жамоасига етказиб бериш. Раҳбарларга раҳмат айтаман, улар бизга жуда яхши шароитларни яратиб беришди. Базамиз, автобусимиз бор. Ҳамма нарсамиз бор. “Турон” келаси йили Суперлигага чиқса, ҳозирги ёшлар жамоамиз таркибидаги 70-80 фоизи ўринбосарлар жамоасида ўйнашади. Қаерда ишлашимдан қатъий назар доим маҳаллий футболчиларга эътиборимни қаратганман. Раҳбарият менга юқорида айтиб ўтган ёшлар жамоаларини ишониб топширишди.

Андижондаги ўйин

- “Андижон” U-19 жамоасининг “Хоразм” билан ўйинини кўриб чиқиб, таҳлил қилгандик. Сафарда ютиб келишди, жамоаси яхши. “Андижон” U-19 га ҳам яхши шароитлар яратилганини эшитдим. Бу ердаги ўйинчилар анча йилдан бери бирга. Биз эса йиғилганимизга 4 ой бўлди. Сафардаги очкони барибир қиймати баланд. Тўғри, дарвозабонимизни ўйини менга ёқмади. Олдинги учрашувларда яхши ўйин кўрсатганди. Бу ёшда бир яхши, бир ёмон ўйнашади. Бу сафар ўйинимиз чиқмади, аммо бир очко олдик.

Про лига ҳақида

- Про лигада бу йил интрига кучли. Бир қатор вилоятни бош жамоалари курашишяпти. “Турон”ни Суперлигага қайтишини истаймиз. Ана шунда бу ёшларимиз қолиб кетишмайди. Ҳозирги болаларни 16 ёшлигида оламиз ва 19 ёшда ўринбосарлар таркибига берамиз. “Насаф”, “Бунёдкор” каби жамоаларга қараб интиляпмиз. Қачондир “Насаф”да ишлаганимда ҳокимга академия ташкил қилиш, ёшларни тарбиялашга эътиборни ошириш ҳақида айтардим. Мана, “Насаф”ни кўриб турибсиз, қандай даражадалигини.

Етакчилар хусусида

- Ўтган йили унчалик про лигани кузата олмагандим. Аксига олиб Суперлигада “Турон”нинг асосий жамоасини ҳам бошқардим. Бу йил кураш жуда қизғин. Охирги пайтларда “Шўртан” ҳам ўйинига анча қўшди. Муборакка бориб ютиб келишди. “Андижон” “Зомин”ни 2:1 ҳисобида қийинчилик билан ютди. “Турон” эса худди шундай қийинчилик билан “Шўртан”ни мағлубиятга учратди. Ўйлайманки, “Турон” албатта Суперлигага чиқади. Унга “Бухоро” ёки “Андижон” шерик бўлиши мумкин. Иккинчи давра энди бошланди, ҳали ҳаммаси олдинда. Ундан кейин учинчи босқич бор. Ким охиригача қандай чидашига ҳам боғлиқ. Жисмоний томондан ким кучли бўлиб, ўйиндан-ўйинга кучайиб борса, ўша жамоа чиқади.

Суперлига

- Суперлигада фаворитлар кўп. Мени ҳайрон қолдираётган ҳеч ким йўқ. Олдин ҳам сизга айтгандим, “Насаф” ўйин бўйича ҳозир ҳаммадан кучлироқ. Бу клубда яна иккита захира ўйини бор. Агар иккаласини ютса ҳаммадан олдинга чиқиб кетиши мумкин. Эсдан чиқарманглар, “Насаф” кучли рақиблар билан ўйнаб келяпти. “Насаф”да имконият кўпроқ, аммо ҳамма нарса ўзгариб кетиши ҳам мумкин. Лекин ҳозирги пайтда қаршиликларнинг ўйини кўпроқ ёқяпти.