Мареска: "Жамоам кундан-кунга яхшиланиб бормоқда"

Англия Премьер-лигасининг 34-турида "Челси" "Эвертон" билан куч синашиб, Жексоннинг голи эвазига 1:0 ҳисобида ғалаба қозонди. Ушбу беллашувдан сўнг жамоа бош мураббийи Энцо Мареска ўйин ҳақида ўз фикрлари билан ўртоқлашди.

"Биринчи бўлимда ўйинни назорат қилдик. Биз ҳукмронлик қилдик ва дарвозамиз олдида ҳеч қандай имконият бермадик. Керакли пайтда кучли ва агрессив бўлишга эришдик.

Николас Жексон, Коул Палмер, Роберт Санчес ҳақида кўп бор гапирганмиз — уларга шубҳамиз йўқ. Бу даврда уларни қўллаб-қувватлашимиз керак. Нико бугун гол урди. Коул ҳам жуда яхши ўйнади.

Ўйин якунида ҳам жамоадошлари Санчес билан бирга байрам қилишди. Улар Роберт учун бу оғир давр эканини билади ва уни қўллаб-қувватлашяпти".

Лавия ҳақида

"Ромео билан "Сити"да бир мавсум бирга ишлаганман. Уни яхши биламан. У ҳам, Рис Жеймс ҳам топ ўйинчилар. Биз уларни асрашимиз керак. Рис ва Ромео билан "Челси" анча кучли бўлади. Ромео соғлом бўлганда, у энг яхши ярим ҳимоячилардан бири. У яхши ҳимоя қила олади ва чизиқлар оралиғида ажойиб паслар беради".

Жамоадаги мувозанат ҳақида

"Бизнинг жамоа ўйиндан ўйинга яхшиланиб боради, чунки футболчилар ҳар хил ўйинларда қандай ҳаракат қилишни яхши тушуна бошлашади. Шу сабабли мухлислар бизга ишониши керак — бизнинг йўлимиз узоқ, лекин футболчилар кўп нарсага эришади", — дея таъриф бериб ўтди италиялик мутахассис.