Marko Stanoevich: "Raqib kim bo‘lishidan qat’iy nazar har bir o‘yin biz uchun finalga teng"

Qarshining “Nasaf” klubida yangi futbol mavsumini sovrin yutish bilan boshlash imkoniyati bor edi. Biroq “Paxtakor” Superkubokni “Nasaf”dan ko‘ra ko‘proq xohladi, chog‘i. Chunki yakunda Ro‘ziqul Berdiev jamoasi mag‘lubiyatga uchradi.

O‘yinda ishtirok etgan qarshiliklarning serbiyalik yarim himoyachisi Marko Stanoevichga ham ko‘p narsa bog‘liq edi. Ammo jamoa etakchisidan ham shu kuni omad yuz o‘girdi. Sports.uz muxbiri esa Stanoevichga o‘yinga taalluqli savollar bilan murojaat qildi.

- Marko, nima deb o‘ylaysiz, “Nasaf” Superkubokda mag‘lubiyatga loyiq o‘yin ko‘rsatdimi?

- Biz joriy yildagi ilk rasmiy o‘yinni o‘tkazdik. O‘ylaymanki, Superkubok o‘yinidan xulosa chiqaradigan bo‘lsak, biz hali optimal darajaga etmadik. Bundan ham yaxshiroq to‘p sura olishimizga ishonaman. Endi navbatdagi uchrashuvda o‘zimizning nimalarga qodirligimizni ko‘rsatishga harakat qilamiz.

- O‘yin davomida sizni ko‘proq asabiylashgan holda ko‘rdik. Nima bo‘ldi?

- Menda juda qulay vaziyat bo‘lgandi. Shulardan foydalana olmaganim tufayli ham juda asabiylashgan bo‘lsam kerak. Ehtimol, hammasi shunga bog‘liq bo‘lgandir.

- Mavsumni g‘alaba bilan boshlash har doim yoqimli va juda muhim. Lekin Superkubokdagi mag‘lubiyat “Nasaf” futbolchilarining kayfiyatini tushirib yubordimi?

- Albatta, boshlanayotgan yangi mavsumni sovringa ega chiqish bilan qarshi olish ajoyib ish bo‘lardi. Baxtga qarshi buning iloji bo‘lmadi. Raqibning kim bo‘lishidan qat’iy nazar biz uchun chempionatdagi har bir uchrashuv finalga teng bo‘ladi.

- Oldinda “Navbahor”ga qarshi chempionatning ochilish o‘yini turibdi. Ushbu bahsga qanday tayyorlanyapsizlar? Endi Namangandagi uchrashuvda boshqacha “Nasaf”ni ko‘ramizmi?

- Har bir uchrashuvga maksimal darajada hozirlik ko‘rib, g‘alaba qozonishga harakat qilamiz. Bizning qanday harakatlanishimizni esa murabbiylar shtabi vakillari belgilab berishadi.

- “Paxtakor”ga uchralgan mag‘lubiyatdan keyin bosh murabbiy sizlarni jiddiy tanqid qildimi?

- O‘yindan keyin hamma natijadan xafa edi. Chunki barchamizda Superkuboni yutish istagi bor edi. Lekin bu endi mavsumning boshlanishi xolos. Oldinda hali ko‘p o‘yinlar bor.

- Stadiondagi muhit, maydonning holati va tashkilotchilik borasida nima deya olasiz?

- Stadiondagi muhit juda yaxshi bo‘ldi. Superkubok bahsini tashkil etilishi ham o‘z o‘rnida bo‘ldi. Bu o‘yinda bizni qo‘llab-quvvatlagan muxlislarga esa minnatdorchilik bildirib qolamiz.

- Dragan Cheran yana hammasini hal qildi. Eshitishimcha, siz u bilan “Nasaf”da birga to‘p surishni juda istagan ekansiz. “Nasaf”dagilar Cheranni sog‘inishdimi?

- Cheran – katta usta. Aynan uning hal qiluvchi zarbasi bellashuv taqdirini belgilab berdi. Cheran o‘tgan yilgi Kubok uchrashuvida ham o‘zini haqiqiy professional sifatida ko‘rsatgandi.

- Sizningcha, yangi mavsumda qaysi klublar favorit?

- Hali birinchilik boshlanmasdan falon-falon klublar asosiy favoritlar, deya sanab chiqish to‘g‘ri ish bo‘lmasdi. Hammasini maydondagi o‘yinlar belgilab beradi. O‘ylaymanki, chempionat qiziqarli ruhda o‘tsa kerak. Yuqoridagi savolingizga faqat birinchi davra bellashuvlari nihoyasiga etganidan so‘ng mana bu klublar sovrinli o‘rinlar uchun kurasha olishadi, deya javob berish mumkin bo‘ladi.