Март ва апрель ойида бўладиган профессионал бокс оламидаги супер жанглар! (Анонс)

Жорий йилнинг баҳор ойларида ҳам профессионал бокс оламида бир қатор супер жанглар бўлиб ўтиши эълон қилинди. Аксарияти, мухлислар диққат эътиборида бўладиган қарама-қаршиликлар деб айтсак, муболаға бўлмайди.

Биз ушбу жанглар борасида бироз тўхталиб ўтамиз. Яъни, март ва апрель ойида бизни кутиб турган ажойиб тўқнашувлар билан таништириб ўтамиз.

25 март (АҚШ, Лас-Вегас, MGM Гранд, Гранд Гарден Арена)

Давид Бенавидес (АҚШ) -Калеб Плант (АҚШ)

Иккинчи ўрта вазн (76,2 кг) тоифасида WBC вақтинчалик чемпионлик камари учун бўлиб ўтади. Умуман олганда, бир-бирига муносиб рақиблар деб айтишимиз мумкин. Бенвидес 26 та жанг ўтказган ва барчасида ғалаба қозонган. Ғалабаларининг 23 тасини муддатидан аввал қўлга киритган. Плант эса 22 та ғалаба ва бир мағлубият қайд этган. Ўша биргина мағлубиятини Сауль Альваресдан қабул қилиб олган.  Хуллас, қизиқарли жангни гувоҳига айланамиз.

1 апрель (Буюк Британия, Лондон, О2 Арена,)

Энтони Жошуа (Буюк Британия) – Жермейн Франклин (АҚШ)

Ҳа, Жошуа ҳақида ортиқча тўхталиб ўтмаймиз. Оғир вазн тоифасидаги ТОП боксчилардан бири, собиқ чемпион ва унинг юртимизда кўплаб мухлислари топилиши аниқ. 24 та ғалаба ва 3 мағлубиятли натижага эга. Уларнинг иккисини барчага маълумки, Александр Усикдан қабул қилиб олган. Шунингдек, Энди Руис ҳам уни мағлубиятга учрата олганди. Франклин ҳам  анчагина истеъдодли боксчи саналади. Унинг рекорди 21 та ғалаба ва бир мағлубиятдан иборат. У сўнги жангида Диллиан Уайтга мағлуб бўлганди. Тўғри, бу қарама-қаршиликда Жошуа яққол фаворит. Бироқ, боксда ва айниқса, оғир вазн тоифасида кутилмаган вазиятлар рўй бериши мумкин.

8 апрель ( АҚШ, Ньюарк, Пруденшал Центр)

Шакур Стивенсон (АҚШ) – Шуичиро Ёшино (Япония)

Енгил вазн (61,2 кг) тоифасида WBC камарига расмий даъвогарлик мақомини берувчи жангда икки мағлубиятсиз одимлаётган истеъдодлар тўқнаш келади. Албатта, Стивенсон ярим енгил (57,2 кг) ва иккинчи ярим енгил вазн (59 кг)да ажойиб натижалар қайд этган. Шундан сўнг, у вазнини кўтарди ва аста-секин ушбу дивизионда ҳам ўз сўзини айтмоқчи. Стивенсон 19 та жанг ўтказган ва юқорида айтиб ўтганимиздек, барчасида ғалаба қозонган. 9 маротаба муддатидан аввал муваффақият қозонган. Ёшино эса 14 та жанг 14 та ғалаба ва 11 бора рақибларини нокаут билан мағлуб этган. Хуллас, яхши жанг бўлади.

15 апрель (Буюк Британия, Лондон, Коппер Бокс Арена)

Жозеф Жойс (Буюк Британия) – Чжан Чжилей (Хитой)

Ҳар икки боксчи ўзбекистонлик мухлислар учун жуда яхши таниш десак, янглишмаган бўламиз. Чунки, мазкур боксчилар ҳамюртимиз Баҳодир Жалоловнинг эҳтимолий рақиблари дея ҳисобласак, муболаға бўлмайди. Англаганингиздек бу баҳс оғир вазн тоифасида ва вақтинчалик WBO чемпионлик камари учун бўлиб ўтади. Жойс 12 та жанг ва 12 та ғалаба, 11 тасини муддатидан аввал қўлга киритган. Хитой вакили эса 23 та ғалаба, 1 мағлубият ва 1 дуранг қайд этган. Назаримда Чжилей Жойсга муносиб рақобат кўрсата олади. Юқорида санаб ўтган омиллар туфайли, бу қарама-қаршиликка қизиқиш юртимизда ҳам анчагина юқори бўлиши турган гап.

22 апрель

Жервонта Девис (АҚШ) – Раян Гарсия (АҚШ)

Менимча ушбу қарама-қаршиликка бўлган қизиқиш бутунжаҳонда катта қизиқишга сабаб бўлмоқда. Ҳа, ҳар иккиси енгил вазн (61,2 кг) тоифасининг том маънодаги юлдузлари деб айта оламиз. Девисда 27 та жанг ва барчасида ғалаба, 25 та нокаут. Гарсия эса 22 та ғалаба ва 19 та нокаут. Улардан бири ушбу жангда фаолиятидаги илк мағлубиятини қабул қилиб олиши мумкин. Хуллас, том маънодаги супер жанг!

29 апрель (Буюк Британия, Лондон, Уэмбли,)

Александр Усик (Украина) – Тайсон Фьюри (Буюк Британия)

Мана бу жанг ҳам ер шарини иккига бўлувчи тўқнашув бўлади, деб бемалол айта оламиз. Оғир вазн тоифасида мутлақ чемпионлик (WBC, IBF, WBO, WBA чемпионлик камарлари учун) учун бўладиган ушбу баҳсга Лондон шаҳри мезбонлик қилади. Ҳа, Усик яна бир британ боксчисига қарши чиқади. Бугунга келиб, Фьюри 33 та ғалаба ва бир дуранг қайд этган. 24 та ғалабасини муддатидан аввал қўлга киритрган. Усикда эса 20 та жанг ва барчасида ғалаба,13 бора нокаутли муваффақият бор. Бир сўз билан айтганда жуда ҳам шиддатга йўғрилган супер жангни гувоҳига айланамиз!

Албатта, бир қатор юртдошларимизнинг ҳам жанглари бўлиб ўтиши кўзда тутилган. Бу ҳақида эса алоҳида тўхталиб ўтамиз. Тўғри, яна бир қатор жанглар эълон қилинган. Биз эса, улар орасида энг катта қизиқишга сабаб бўлаётганлар ҳақида сўз юритдик.