Мартинесга Англиянинг тўп клубидан харидор чиқди

Лаутаро Мартинесга Англия Премьер-лигасининг "Арсенал" клуби жуда катта қизиқиш билдирмоқда. 
 
Хабарингиз бор, Артета бошчилигидаги "канонирлар"нинг ҳужум чизиғидаги бир неча футболчилари жароҳат олиб, сафдан чиққан. Булар орасида, Букайо Сака ва Габриель Мартинелли бир ойдан кўпроқ вақтда жамоага ёрдам бера олмаса, Жесус мавсум сўнггига қадар сафдан чиққан. 
 
"Fichajes" нашрининг маълумотига кўра, клуб мутасаддилари ушбу йўқотишлар сабаб ёзги трансферлар ойнасида янги ҳужумчи харид қилишни мақсад қилиб қўйган. Манбага кўра, "тўпчилар" ҳозирги кунда энг яхши вариант сифатида "Интер" ҳужумчиси ҳисобланган Мартинесни кўзлаб қўйди. Агарда италияликлар футболчини қўйиб юбормоқчи бўлса, лондонликлар таклиф билан чиқишга тайёр. 
 
Маълумот ўрнида, аргентиналик форвард жорий мавсум "нераззурилар" сафида 32 та беллашувда иштирок этиб, 15 та гол ва 6 та голли узатмага муаллифлик қилди. Унинг клуб билан шартномаси 2029 йилгача мўлжалланган бўлиб, Тransfermarkt порталидаги нархи 100 миллион евро деб баҳоланмоқда.