"Машъал"нинг "тактикаси" ўтмади. Ўйин атрофи ва ўйин ичида нималар юз берди?

Про лигада пешқадамлик учун кураш жуда жиддий кечяпти. Айниқса, 1-ўрин учун “Андижон” билан “Турон” ўртасида юз бераётганини барча кўриб турибди.

Виктор Кумиков жамоаси жуда тиғиз тақвим остида ҳаракат қилмоқда. “Андижон” 1 ҳафта ичида 3 та ўйинда майдонга тушиши олдиндан аниқ эди. Биласиз, 3 сентябрь куни ўз майдонида Ўзбекистон Кубоги чорак финалида АГМК билан ўйнади. 7 сентябрда про лига доирасида 16-турнинг қолдирилган учрашувида Муборакда “Машъал” билан беллашган бўлса, энди 10-санада Бухорода мезбон – “Бухоро”га қарши ўйнайди. Кўриб турганингиздек, “Бургутлар” қийин вазиятда, бироқ бундан муносиб чиқишга ҳаракат қилаётгани эътиборга молик.

Бевосита “Машъал” билан учрашувига тўхталадиган бўлсак, бу айниқса, мезбонлар учун катта аҳамиятга эга эди. Негаки, очколар бўйича яқин таъқибчиларидан ортда қолиб кетаётганди. Шунинг учун Дилявер Ваниев жамоасига бу учрашувда ғалаба сув ва ҳаводек зарур эди.

Рости, “Машъал” бу ўйиннинг аҳамияти ва ундаги ғалаба қанчалик муҳимлигини яхши билган ҳолда ўйин ичида “ўйин” ҳам қилишга уриниб кўрди. Жумладан, клуб томонидан ўйин куни соат 09:15 да “Машъал” жамоаси “Андижон”га қарши про лига 16-тур ўйини олдидан бир қатор футболчилари жароҳати ва карточкалари туфайли жамоага ёрдам бера олишмайди”, деган хабар эълон қилинди. Унга кўра Микола Агапов, Равшан Ягудин, Жалолиддин Баҳодиров ва Саидмаҳмудхон Ғуломов жароҳати туфайли, Сирож Раҳматуллаев эса сариқ карточкалари тўрттага етганлиги сабабли “газчи”ларга ёрдам бера олмасликлари ёзилганди.

Ушбу хабарнинг айнан ўйин куни эрталаб чоп этилиши анча шубҳали туюлди. Жароҳат олган футболчлар нега айнан куни расмий тарзда хабар берилгани саволларни келтириб чиқарди. Энг қизиғи шундаки, учрашув бошланишига салкам бир соат вақт қолганида соат 16:06 да “Хушхабар!” дея навбатдаги хабар жойланди. Унда Микола Агапов, Равшан Ягудин ва Саидмаҳмудхон Ғуломовлар жамоамиз шифокорларининг тинимсиз ҳаракатлари туфайли “Андижон”га қарши кечадиган учрашувда майдонга тушадиган бўлишди”, деган хабар эълон қилинди.

Ҳаммаси маълум: бу “Машъал” томонидан ўйин ичидаги “ўйин” бўлиб чиқди. Бу билан балки “Андижон”ни бироз бўшаштиришни режа қилишгандир. Аммо муборакликларнинг “тактикаси” ўтмади.

Қизиғи, “Машъал” жамоаси охирги марта 28 август куни ўз уйида “Турон”га қарши 1:1 ҳисобида дуранг ўйнаганди. “Андижон” эса юқорида айтганимиздек, жуда тиғиз тақвимда ўйинлар ўтказяпти ва бир ҳафта 3 та ўйин белгиланган. Шуни ҳисобга олсак, муборакликларда бу учрашувга тайёрланиш учун етарлича вақт бўлган. Аниқроғи 10 кун давомида “Андижон”га қарши баҳсга тайёргарлик кўрдилар. “Андижон” бўлса, 3 сентябрда АГМКга қарши майдонга тушганди ва “Машъал” билан ўйинга тайёргарлик учун айтарли ҳеч қанча вақт қолмаганди. Шунга қарамай, “Бургутлар” Муборак майдонида ўзи учун жуда муҳим ғалабани қўлга киритишга муваффақ бўлди.

Дарвоқе, “Машъал” – “Андижон” ўйинини кузатиш учун “Бухоро”дан расмийлар ҳам келди. 10 сентябрь куни бухороликлар ўз уйида “Андижон”ни қабул қилади. Шу сабабли бош мураббий Ҳаким Фузайлов ва жамоа мутасаддилари Муборакдаги “Баҳром Вафоев” номли стадионда бевосита учрашувни томоша қилдилар. Ўзига хос “айғоқчи” сифатида гавдаланган Фузайлов баҳсни жуда синчковлик билан кузатиб борганига амин бўлдик.

Кўрган бўлсангиз, учрашувда дарвозаларга иккита пенальти белгиланди. Иккинчи тайм бошларида “Машъал”, сўнг “Андижон” бу вазифадан фойдаланди. Умуман олганда, бош ҳакам Ильгиз Танташев учрашувни яхши бошқарди. Дарвоқе, андижонликлар футболчиси Суҳроб Бердиев ушбу баҳсда “Андижон” таркибида ўзининг илк голини уришга муваффақ бўлди ва бу голини дадасига бағишлади.