Машҳур футболчи “Манчестер Юнайтед”га идеал мураббий топиб берди

Англия миллий терма жамоаси ва “Манчестер Юнайтед” клуби собиқ ярим ҳимоячиси Пол Скоулз айни пайтда Бразилия терма жамоасини бошқараётган Карло Анчелоттини манчестерликлар учун идеал мураббий эканини таъкидлади.

Ҳозирда жамоа вақтинчалик мураббий Майкл Кэррик бошчилигида яхши натижалар кўрсатмоқда ва у доимий бош мураббийликка асосий номзод саналади.

Бироқ Скоулз Кэррикнинг тажрибасига шубҳа билан қарайди ва “Юнайтед”га катта тажрибага эга мураббий керак, деб ҳисоблаяпти.  Унинг фикрича, Анчелотти айнан шундай номзод.

Скоулз Анчелотти футболчиларга ишонч бағишлай олишини, катта совринларни ютиш тажрибасига эга эканини айтди. Унинг сўзларига кўра, асосий масала – италиялик мутахассиснинг ёши катта экани муаммо бўлиши мумкинлигида.

Шунингдек, Скоулз Кэррикнинг Чемпионшипда ишлагани Премьер-лигада чемпионлик учун курашиш билан тенг эмаслигини уқтирди.