Математикадан яхши ўқиган ўқувчи ҳам терма жамоага келганда қийналади ёхуд Ўзбекистон МТЖнинг аҳволи қандай?

Жаҳон чемпионати иккинчи саралаш босқичи катта қизиқишларга сабаб бўлмоқда. Ўз навбатида, хавотирга ҳам.

Ўзбекистон миллий терма жамоаси ўйнаганда нега доим ҳисоб-китоб авжига чиқади. Сабабини билмадимку, лекин сиз терма жамоа мухлиси бўлсангиз математикани яхши билишингиз керак. Чунки охирги турларда доим қўлимизга калькулятор олишимиз лозим. Бармоқларимиз камлик қилади.

Айни пайтда Осиё қитъаси саралашида чигал вазият юзага келмоқда. Аммо бунга ўзимиз сабабчимиз. Ўйинларда ғалаба қозонганимизда, йўқ жойда очколарни бой бермаганимизда, бош оғриғи қилиб ўтирмасдик. Ҳали имкониятимиз бор. Бунинг учун мезбонларни таслим этишимиз шарт. Шундагина кейинги босқичга чиқамиз.

"F" ва "H" гуруҳида охирги тур ўйинлари якунланди. Тожикистон ва Ливан 10 очко билан иккинчи ўринда ушбу босқични тамомлади ва энг яхши иккинчи ўрин бўйича ҳамюртларимиздан ўтиб кетди. Мағлубият бизни қониқтирмайди. Дурангчи? Учрашувда ғолиб номи аниқланмаса Саудия ва Ўзбекистон 1 очкодан қўлга киритади. Саудияликлар биринчи ўрин билан кейинги босқичга йўл олади. Вадим Абрамов шогирдлари ҳисобида 10 очко бўлади ҳамда Ливан ва Тожикистонники билан тенглашамиз. Бу ҳолатда ким юқорида бўлади? Бундай пайтда қўшимча кўрсаткичлар саҳнага чиқади. Яъни голлар, сариқ ва қизил карточкалар. Шу жиҳатларга кўра, терма жамоамиз улардан олдинда бўлиши мумкин. 

Шунингдек, БАА - Вьетнам, Эрон - Ироқ, Фаластин - Яман ва Австралия - Иордания баҳслари биз учун аҳамиятли. Сабаби БАА, Эрон ёки Иорданиянинг натижаси бизнинг кейинги босқичга чиқишимизга бевосита боғлиқ, агарда ҳамюртларимиз дуранг ўйнаса. Саудияга қарши баҳсда дуранг қайд этсак, шу 3 жамоадан қайсиларидир очко йўқотишини кутамиз. Кўрдингизми? бизга математикадан яхши ўқиган одам ҳам аниқ жавобини айта олмайди...

Асосийси, тақдиримиз ўз қўлимизда. Саудияни ютсак, қолгани бекор. Майдонга тушиб, борини бериб, рақибни таслим этиш лозим. Биз терма жамоамизга ишонамиз! Олға Ўзбекистон!!!