Мавсум олдидан ўйин назоратчилари ва ҳакамлар тестдан ўтказилади

Эртага Суперлига, Про лига, Биринчи лига ва аёллар футболи чемпионатларида фаолият олиб борадиган ўйин назоратчилари учун амалий-назарий семинар ташкил этилади. Бу ҳақда ЎФА матбуот хизмати хабар тарқатди.

Семинарда назоратчилар учун футбол ўйин қоидалари бўйича назарий тестлар ҳамда ўйиндаги вазиятлар бўйича видео машқлар ўтказилади.

Шунингдек, 18-22 январь кунлари Суперлига баҳсларида ишлайдиган арбитрлар ва уларга номзод бўлган ёш ҳакамлар учун тўрт кунлик ўқув-машғулот йиғини бўлиб ўтади.

Даставвал ҳакамларнинг жисмоний тайёргарлиги синалади, ҳусусан, улар "Yo-yo" тестини топширади. Шундан сўнг, ўйин қоидалари бўйича назарий машғулотларга старт берилади.

Йиғин давомида мазкур ҳакамлар Тошкентда ўтадиган ўртоқлик учрашувларида фаолият олиб боради. Бундан ташқари, ушбу ўйинларда VAR технологиялардан фойдаланган ҳолда, ҳакамларни VAR тестидан ҳам ўтказиш амалиёти йўлга қўйилади.