Мбаппе ПСЖдан "Реал"га ўтганининг асл сабабини тушунтирди

«Реал» ҳужумчиси Килиан Мбаппе нега ПСЖни тарк этишга қарор қилгани ҳақида фикр билдирди. Унинг сўзларига кўра, Париж клубидаги саёҳати табиий тарзда якунига етган.

- ПСЖдан кетиш ҳақида қарор қилган пайтимда, у ердаги вақтим тугаганини ҳис қилдим. Клуб учун қўлимдан келган барча ишни қилдим, ўз вазифамни муносиб бажардим, деб ўйлайман. Лекин менинг орзум бор эди – «Реал» сафида ўйнаш. 25 ёшимда бу қадамни қўйиш учун энг тўғри фурсат деб билдим. Мен учун бу энг тўғри қарор бўлди, - дея Мбаппе сўзларини келтиради The Athletic нашри.

Франция терма жамоаси етакчиси ПСЖ таркибида етти мавсум ўйнади. У шу давр мобайнида жамоа билан бирга Чемпионлар лигаси финали, ярим финали ва чорак финалигача етиб борди.

- Мен ПСЖда етти йил ўтказдим. Чемпионлар лигаси финалида, ярим финалида, чорак финалида ўйнадик. Лекин кетиш вақти келди, клуб эса бошқа йўлни танлади. Улар олти-етти нафар янги футболчи сотиб олишди ва жамоани тубдан янгилашди. Ва натижада Чемпионлар лигасида ғолиб чиқишди. Уларни табриклайман, - деди Мбаппе.

Эслатиб ўтамиз, Килиан Мбаппе 2024 йил ёзида «Реал» сафига ўтди. Мадрид клуби билан тузилган амалдаги шартномаси 2029 йилгача мўлжалланган. Нуфузли Transfermarkt портали баҳосига кўра, футболчининг трансфер қиймати 200 миллион евро атрофида баҳоланмоқда.