Мбаппе қачонгача футбол ўйнолмайди?

Испания чемпионатининг еттинчи турида “Реал”нинг “Алавес”га қарши ўтказган учрашуви мадридликларга қимматга тушди.

Жамоанинг асосий тўпурарига айланиб бораётган Килиан Мбаппе ўйинда оёғида оғриқ ҳис қилиб, уни алиштиришларини сўради. Ўтказилган тиббий текширувлар франциялик ўйинчи чап оёқ сони мушакларидан жароҳат олганини кўрсатди.

The Athletic нашри “Реал” мутасаддилари билан боғланиб, 25 ёшли чарм тўп устасининг аҳволи билан қизиқди.

Манбанинг маълум қилишича, Мбаппенинг бу жароҳатдан тўлиқ қутилиши учун уч ҳафтагача вақт керак бўлади.

Килиан ёзда ПСЖдан эркин агент сифатида Мадридга келганди. Янги жамоада барча турнирларда тўққизта учрашувда еттита гол урди ва битта ассист қайд этди.