Мбаппе: “Реал”га ўтмаганимдан афсусланмайман!

Килиан Мбаппе 2022 йилнинг ёзида “Реал”га ўтмасдан, ПСЖ билан шартнома тузган эди. 25 ёшли футболчи ўшанда нега шундай қарорга келганини очиқлади.

- Ўшанда масала фақатгина ПСЖда қолиш бўлмаган. Кўп нарса Қатар мезбонлигидаги “Жаҳон чемпионати – 2022” ва бошқа муҳим жиҳатларга боғлиқ эди.

Мен жуда муҳим ва анчагина оғир қарор қилишимга тўғри келди. Бундан умуман афсусда эмасман. Ўшанда вазият ўта оғир эди, бунақасини ҳеч кимга раво кўрмайман, - деди Килиан Мбаппе.

Франциялик форварднинг Парижда қолиши маълум бўлганидан кейин уни қўлга киритишга яқин келиб, мақсадига ета олмаган “Реал” президенти Флорентино  Перес билан орага совуқчилик тушган эди.

Мана орадан икки йил ўтиб, Килиан Мбаппе Мадридга йўл олиши кутилмоқда. Гарчи Европа матбуоти келишув имзолангани ҳақида маълумот тарқатаётган бўлса-да, бу ҳали расман тасдиқлангани йўқ.