Мбаппе ва Беллингем “Манчестер Сити”га қарши ўйнайдими?

Мадриднинг “Реал” клуби ярим ҳимоячиси Жуд Беллингем ва ҳужумчи Килиан Мбаппе Европа Чемпионлар лигаси 1/8 финалининг “Манчестер Сити”га қарши биринчи ўйинини ўтказиб юборади.

Бу ҳақда The Athletic нашри хабар берди.

Манба маълумотига кўра, Беллингем ҳали ҳам сон орқа мушаги жароҳатидан тикланмоқда. Мадрид клубида 22 ёшли англиялик футболчи 17 март куни бўлиб ўтадиган жавоб ўйинигача майдонга қайтишига умид қилишмоқда.

Бироқ унинг қайтиши учун энг эҳтимолий вариант 22 март куни бўлиб ўтадиган “Атлетико”га қарши чемпионат ўйини деб ҳисобланмоқда.

27 ёшли Мбаппе масаласига келсак, “Реал”дагилар унинг ҳам манчестерликларга қарши майдонга туша олмаслигини жуда яхши ҳис қилиб турибди.  Бундан ташқари, унинг жавоб ўйинига тайёрлиги ҳам ҳозирча савол остида қолмоқда.

Ҳар икки футболчининг майдонга қайтишининг аниқ муддатлари ҳозирча белгиланмаган. Клубда жароҳатлар яна оғирлашиб кетмаслиги учун уларнинг тикланишини тезлаштиришдан эҳтиёт бўлишмоқда.

Чемпионлар лигаси 1/8 финали доирасидаги “Реал” ва “Манчестер Сити” ўртасидаги биринчи учрашув 11 март куни “Сантьяго Бернабеу” стадионида бўлиб ўтади.