"Мен кутган нарсаларимдан кўпроғини кўрдим" - ОФК вакили "Андижон"нинг ОЧЛга тайёргарлиги ҳақида

“Андижон” клубининг 2025 йилда ОЧЛ 2 да иштирок этиши муносабати билан ОФК расмийси қатарлик мутахассис Рашид Ал Доссарининг Андижонга ташрифи ҳамда стадионни кўздан кечиргани ҳақида маълумот бериб ўтдик. Ташрифнинг якунида “Андижон” матбуот хизмати Рашид Ал Доссаридан интервью олди.

- Жаноб Ал Доссари, сиз илк бор Андижонга ташриф буюрдингиз. Бу ерда ўзингиз истаган барчасини кўздан кечирдингиз. Айтинг-чи, ташрифдан аввал қандай фикрда эдингиз ва энди таассуротлар қандай?

- Ишонинг, мен биринчи марта Андижонга келяпман ва бу ерда кўрганларимдан ҳайратдаман. Шаҳар ҳам, стадион ҳам менга ёқди. Чунки мен кутган нарсаларимдан кўпроғини кўрдим. Энг муҳими, мавжуд камчиликларни вақтида бартараф этилса, клуб раҳбарияти менга берган ваъдаларини бажаришса, жамоа ва стадион Осиё Чемпионлар лигасига тайёр бўлади. Рости, стадионни ҳозирги ҳолати ҳам яхши даражада. Албатта, халқаро даражага олиб чиқиш учун бироз қилиниши керак бўлган ишлар мавжуд. Бу борада раҳбариятни аниқ режаси бор. Бу тўлиқ бажарилса ишончим комилки, бемалол ОЧЛ ўйинларини ўтказади.

- “Андижон” Ўзбекистон Кубогини қўлга киритиш орқали ОЧЛга йўлланмани қўлга киритди ва унда дебют мавсумини ўтказади. Бундай нуфузли мусобақада ишларни ҳар томонлама тўғри йўлга қўйиш учун мутахассис сифатида қандай маслаҳат бера оласиз?

- Ўйлашимча, ўзгаришлар майдонда ҳам, майдондан ташқарида ҳам бўлиши керак. Халқаро тажрибага эга бўлган ўзбек ва хорижлик футболчиларни жалб қилиш лозим. Агар “Андижон” клуби Осиё Чемпионлар лигасида ҳар йили қатнашмоқчи ва ўсишга эришмоқчи бўлса, боя айтганимдек, майдонда ҳам, майдон ташқарисида ҳам тажрибали мутахассислар бўлиши керак. Яхши ўйинчиларни ўйнатиш учун яхши мураббийлар керак ва ўйлашимча, бу сизларда бор.

- “Андижон” фан-клуби Ўзбекистонда биринчи рақамли. Ишонамизки, жамоанинг ОЧЛдаги ҳар бир иштироки фантастик муҳитда ўтади. Ўз навбатида бу ОФКнинг ўзи учун ҳам жуда ёқимли кечади ва ОЧЛ мусобақасини безаб беради. Бунгача клуб ва мухлисларимиз ҳақида нималарни билардингиз?

- Тўғрисини айтсам, кўп маълумотим бўлмаган. Лекин мен “Андижон”нинг мухлислари ҳақида эшитганман. Уларнинг жуда машҳурлигидан хабардорман. Билишимча, улар ўйинларни максимал даражада ўзида қабул қилиб, мана шундай муҳитни ҳис қилишлари учун ҳам раҳбарият шунга яраша ҳаракат қиляпти. Аммо баъзида шундай бўладики, ишқибозлар ўз клубини хаддан ортиқ яхши кўрганидан қизишиб кетадилар ва керак бўлмаган ишларга қўл уришлари мумкин. Олдин мухлислар томонидан айрим камчиликлар бўлган. Шуларни ўрганиб чиқиб, хулоса қилишлари лозим. Яна шуни биламанки, ҳар бир жамоа мухлисларининг етакчиси бўлади. У эса тартиб-интизомни яхши ўзлаштириб, қолганларга ҳам тушунтириш ишларини олиб бориб, клубга зарар етказмаган ҳолда қўллаб-қувватлаш даркор.

- Бу борада ҳаммаси кўнгилдагидек. Фан-клуб етакчиси ва мухлислар ҳамма вақт тартиб-интизомга амал қиладилар. Бизнинг ишқибозлар ниҳоятда маданиятли ва фаол. 

- Бу жуда яхши. Мени маслаҳатим бир йиллик ОЧЛ билан қониқманглар. Янада ишлаб, шу даражани ушлаб, ҳар йили Осиё майдонларида иштирок этишингларга тилакдошман. Иложи бўлса, “Андижон” жамоасининг ОЧЛдаги биринчи уй учрашувига ўзим комиссар бўлиб келишга ҳаракат қиламан.