Мени пул учун келди, деб ўйламанг!

“Атлетико”ни тарк этиб, “Ньюкасл” сафига қўшилган англиялик тажрибали ҳимоячи Киран Триппьер унинг премьер-лига аутсайдерини танлашига нима сабаб бўлганини айтди.

“Қарғалар” Испания чемпионидан бу ўйинчини олиш учун 12 миллион фунт сарфлади. 31 ёшли ҳимоячи янги клуби билан 2024 йилнинг ярмигача шартнома имзолади. Унга кўра, Триппьер ҳафтасига 150 минг фунт маош олади. Бу сумма “Атлетико”даги маошидан анча юқори экани айтилмоқда.

Бироқ, Триппьернинг ўзи “Ньюкасл”га пул топиш мақсадида келмаганини таъкидламоқда.

- Бир неча ой муқаддам Англия премьер-лигасига қайтмоқчи эканимни айтгандим. Бундай имкон бўлишини кутаётгандим. “Ньюкасл” варианти мен кутган вазият бўлиб чиқди.

Мен билан ўйнаган футболчилар ва устозлик қилган мураббийлар қанақа одам эканимни яхши билади. Бу ерга фақатгина янги лойиҳа иштирокчиси бўлиш учун келдим. Бошқа таклифлар ҳам бор эди, пухта ўйлаб, “Ньюкасл”га ўтишга қарор қилдим, - деди Киран Триппьер.