Мераб Двалашвили Генри Сехудони "янчиб" ташлайди! (Сўровнома)

Хабарингиз бор, 18 февралга ўтар кечаси АҚШнинг Лас-Вегас шаҳрида “UFC 298” турнири старт олади. Асосий карддан ўта енгил вазн (61,2 кг) вазн тоифасида Мераб Двалашвили ҳамда собиқ чемпион Генри Сехудо қарама-қаршилиги ҳам ўрин олган. Биз анъанага содиқ қолган ҳолда, ушбу тўқнашув борасида ҳам ўзбек яккакураш олами вакилларини фикри билан қизиқдик.

Фарруҳ Мадаминов – мураббий

- Зўр жанг бўлади. Бир-бирига мос рақиблар. Нимани эвазига мос ва тенг рақиблар деяпман. Яъни, Сехудони ёши анча ўтиб қолди. Албатта, спорт томонлама айтяпман. Агар, У Двалашвили билан тенг ёшда бўлганда муаммосиз ғалаба қозонарди. Бироқ, ҳозир ҳам Сехудо уни юта олишга қодир, деб ўйлайман. Чунки, унда катта тажриба бор ва мукаммал жангчи. Мераб ҳам ёш ва ғалабага чанқоқ осонликча таслим бўлмайди. Аммо, кичик устунлик билан Сехудо очколар ҳисобида ғалабани илиб кетса керак. Имкониятларни 55/45 дея баҳолаган бўлардим.

Дмитрий Худяков – мураббий

- Агар, ростини айтсам, бу жангчини деярли кузатмаганман,  ўйлашимча Сехудо ғалаба қозонади. Қоғоздаги статистикага қарасак,  Сехудо  Мерабга қараганда тезроқ ва кучлироқ.  Аммо биз уни қандай машғулот ўтаганини жанга қай даражада тайёрлигини билмаймиз.  Мераб эса жанглар сонини инобатга олсак, ёшроқ ва унда ҳам ғалабага имкон бор.  Бироқ, барибир Сехудо ғалаба қозонса керак.

Мавлон Қаҳҳоров – муайтай жангчиси

- Иккиси ҳам жуда савияли ва “қаттиқ” жангчилар сарасига киради. Сехудо буни кўп бора исботлаган. Бироқ, унинг фаолиятида анчагина танаффус бўлди ва бу унга салбий таъсир қилганини Алджо Стерлингга қарши жангида кўрдик. Мераб худди Алджо каби жанг қилади. Услублар ўхшаш. Қолаверса, унда ғалабага иштиёқ катта. Имкониятларни 60/40 деган бўлардим. Мерад Двалашвили фойдасига!

Бакир Вечный –октагон анонсери

Шиддатли жанг оқшоми бизни кутиб турибди. Мераб Двалишвили ва Генри Сехудо ўртасидаги жанг ҳақида сўз юритсак, Сехудони ёши ўтган бўлса ҳам, эсдан чикармаслик керак, у собиқ Олимпиада чемпиони, собиқ UFCнинг икки вазн тоифасида камар соҳиби бўлган!!! “Партер”да Сехудони кучли деб ўйлайман. “Стойка”да ҳам 45-55 Сехудони фойдасига... Мерабнинг жанг қилиши жамоадоши Алжо Стерлингникига ўхшаб кетади. Бу жангга Сехудо нафақат галаба қозониш учун, балки қасос олиш учун ҳам чиқади. (Стерлинг!!!)  Таҳминим, "сабмишен” эвазига Сехудони ғалабаси, жанг чўзилиб кетса Мерабда имконият  кўпаяди!  Имкониятлар 60/40 Сехудо фойдасига!

Мавлон Мавлонов – мураббий

- Қизиқ жанг! Сехудони ҳаммамиз биламиз, эркин курашда Олимпиада чемпиони ҳисобланади. У кучли IQ га эга. Ким билан қандай жанг қилишни ҳам яхши билади. Ўйлайманки унда жангни ўзига хос режаси бор. Ўтган жангда очколар ҳисобида ютқазиб қўйди. Бу сафар у яхши тайёрланган ва бир нечта хатоларини тўғирлаганлиги аниқ. Мерабнинг кураши унга муаммо бўлмайди. У нима қилишини билади ва унга ҳимояси бор. Агар, Сехудонинг машғулот лагери яхши ўтган бўлса, руҳий жиҳати жойида бўлса, имкониятларни 70/30 деган бўлардим. Албатта, Сехудони фойдасига. Агар у даражада тайёргарлиги зўр бўлмаган бўлса, 60/40 яна Сехудони фойдасига! Албатта, бу шахсий фикрим.

Ҳумоюн Маҳкамов – ММА жангчиси

- Яхши жанг бўлади. Генри Сехудони даври ўтган. Унинг эришган натижаларига ҳурматни сақлаган ҳолда, айтишим мумкинки, Мераб Двалашвили уни шунчаки устидан “янчиб” ўтиб кетади. Чунки, ҳозир унинг кучга тўлган вақти. Яъни ПИК даври десак бўлади. Имкониятларни 70/30 деган бўлардим. Двалашвили муддатидан аввал ғалабани қўлга киритади.