Messi: "Bu bahona emas, hakamlar ko‘p xato qilishmoqda"

Lionel Messi "Orlando Siti"ga qarshi mag‘lubiyatdan so‘ng hakamni qoidalarni bilmaslikda aybladi.

"Inter Mayami" MLS doirasidagi uy uchrashuvida 0:3 hisobida yutqazdi. Mehmonlar hisobni 43-daqiqada ochdi — Luis Muriel darvozabon Pedro Galese tomonidan berilgan uzoq pasdan so‘ng gol urdi. Galese esa bu pasni o‘z jamoadoshining to‘piga teginishidan keyin qo‘li bilan ushlagan edi.

Messi, Jordi Alba va "Inter Mayami"ning boshqa futbolchilari hakam Guido Gonsalesga bu orqaga berilgan pas bo‘lganini tushuntirishga urindi, biroq hakam ularning e’tirozlarini inobatga olmadi.

"Biz ajoyib birinchi bo‘lim o‘tkazdik, hujum qildik, gol uchun imkoniyatlar yaratdik. So‘ngra g‘alati bir vaziyat yuz berdi — "Orlando" futbolchisi darvozabonga pas berdi, ammo hakam bu qoidabuzarlik ekanini bilmasligini menga aytdi.

Shundan so‘ng ular uzoq pas orqali gol urishdi. Ayrim muhim pallalarda xatolar bo‘lishi mumkin. O‘tgan o‘yinda ham shunday holat bo‘lgan. Bu bahona emas, lekin hakamlar ko‘p qo‘pol xatolarga yo‘l qo‘yishmoqda. Menimcha, MLS hakamlik masalasiga jiddiy e’tibor qaratishi kerak", — dedi Messi Apple TV'ga bergan intervyusida.