Месси можарода мағлубиятга учрамоқда

“Барселона” ва Месси ўртасидаги можаро клуб фойдасига ҳал бўладиган кўринади. Гарчи аргентиналик юлдуз Каталонияни тарк этиш фикридан қайтмаган бўлса-да, клубдан ўзи истаганидек эркин агент мақомида  кета олмаслигини тушуниб етди.

Айни пайтда ушбу можаро футболчининг отаси ва агенти Хорхе Мессининг клуб президенти Жозеп Бартомеу билан бўладиган учрашувда ечим топиши кутилмоқда. Бўлажак учрашувда Бартомеу футболчининг вакилларига Месси “Барселона”ни шундоқ ташлаб кета олмаслигини, акс ҳолда иш судга оширилишини уқтиришини маълум қилган. Хорхе  эса ўғлини кетишига рухсат сўрамоқчи.

Ҳозирдан масала “Барселона”  фойдасига ҳал бўладиган кўринади. Чунки Месси даъвогарлик қилган клублар уни текинга қўлга кирита олмаслигини билган ҳолда ҳужумчидан бирма-бир юз ўгирмоқда. Хусусан, Месси учун 700 миллион евро тўлаши айтилган “Манчестер Сити” бош мураббийи Хосеп Гвардиола футболчига “Барселона”да қолиши кераклигини айтмоқда. “Интер” ва “Манчестер Юнайтед” аргентиналик ҳужумчининг трансфери ўзини оқламаслигини билдириб,  эътиборини бошқа футболчиларга қаратадиган бўлди.  

Бир сўз билан айтганда, Мессининг йўллари тобора ёпилиб бормоқда.