Мессини “Барса”га олиб келадиган “бойвачча” топилди

Лионель Мессининг “Барселона”га қайтиши энг кўп муҳокама қилинаётган мавзуга айланди. Бунга аргентиналик юлдузни ПСЖ билан шартномани янгилашдан бош тортаётгани ва каталонияликларнинг ўз тарбияланувчисини ортга қайтариш йўлларини қидираётгани сабаб бўлмоқда.

Таниқли журналист Шей Лугассининг маълум қилишича, Бирлашган Араб Амирликларидан йирик ҳомий чиққан ва у Мессининг трансферини молиялаштиришга тайёрлигини билдирмоқда.

Режага кўра, ҳомий клубга етарли даражада сармоя киритади ва бу каталонияликларнинг молиявий фэйр-плей қоидаларини бузмаган ҳолда аргентиналик юлузни олиб келиш имкониятини таъминлайди.

“Барселона” раҳбарияти айни пайтда Мессини қайтариш йўлларини қидирмоқда. Клуб ҳозирги ҳолатида Месси даражасидаги футболчини трансфер қила олмайди.

Бунга клубнинг молиявий аҳволи ва молиявий фэйр-плей қоидалари йўл қўймайди.