"Металлург" устози: "Яқин кунларда "Навбаҳор" бош мураббийи Ибрагимовдан узр сўрашини кутиб қоламан"

Янги мавсум қайси жамоа учун айниқса омадсиз бошланганини кўпчилик яхши билади. Иккита турдан кейинги натижаларга қарасак, “Металлург” 1-турда ҳам, 2-турда ҳам рақибларига бир хил 3:0 ҳисобида мағлубиятга учради ва мухлисларини ранжитиб қўйди.

Испаниялик бош мураббий Луисма Эрнандес ҳам жамоасининг бундай салбий натижа билан старт олишини кутмаганлиги рост. Аммо тақвимнинг дастлабки турларида бекободликлар водийнинг икки етакчиси – “Нефтчи” ҳамда “Навбаҳор”га қарши майдонга тушишига тўғри келиб қолди.

Икки ўйин натижасига кўра, “Металлург”да гол йўқ ва ўз дарвозасидан 6 та тўп олиб чиқди. Бундай муваффақиятсиз стартдан кейин клуб устозига нисбатан яна саволлар кўпайиши табиий. Намангандаги ўйиндан кейин ҳам Эрнандесга қуйидаги саволлар берилди ва жавоби қуйидагича:

- “Нефтчи” билан ўйиндан кейин ҳам мавсумга тайёргарлик кўнгилдагидек бўлмади, деяпсиз. Буни қандай изоҳлаш мумкин? Мураббий сифатида жамоага ўзингиз жавобгарсиз-ку!

- Албатта, бу баҳона ёки сабаб бўлмайди. Бош мураббий жамоа ва натижа учун жавобгар шахс ҳисобланади. Баъзи-бир факторлар борки, бу менинг масъулиятимга кирмайди. Шуни ҳам ҳисобга олишларинг керак. Клуб томонидан бироз муаммоларимиз бор ва умид қиламанки, яқин кунларда бу муаммони ечамиз. Яна бир сабаб шундаки, ҳимоя чизиғимиздаги айрим ўйинчиларимизда жароҳатлар бор. Бу нарса ҳам ҳозирги кунда ўйинимизни яхши чиқмаётганига сабаб бўляпти.

- Ибрагимов қизил карточка олди. Ундан олдинги баҳсда Касминин четлатилганди. Жамоадаги тартиб-интизом қандай?

- Албатта, “Навбаҳор”ни ва унинг мухлисларини ғалаба билан табриклайман. Иброҳим Ибрагимовни қизил карточкасига келсак, ўша ҳолатдаги вазият бўйича “Навбаҳор” бош мураббийини яқин кунларда Ибрагимовдан узр сўрашини кутиб қоламан. Бу нарса фейр-плейга кирмайди. Бу менинг шахсий фикрим.

Биз фақатгина қаттиқ меҳнат қилишда давом этамиз. Клуб олдига қўйилган мақсад бор. Шунга эришиш бўйича ҳаракат қиламиз. Ўтган йилги натижадан кўра, яхшироғини қўлга киритмоқчимиз. Бу нарсага эришиш учун фақатгина меҳнат қиламиз.

- Раҳбарият сиздан тезроқ натижа кўрсатишни талаб қилаётгандир...

- Фақатгина бу ерда эмас, бутун дунёда шунақа.Раҳбарият фақат натижани талаб қилади.   

Бекободликлар навбатдаги турни 19 март куни ўз майдонида "Қизилқум" жамоасига қарши ўтказади. Кетма-кет иккита йирик ҳисобдаги мағлубиятдан сўнг энди "Металлург" олдида ғалабадан бошқа йўли қолмаганлиги кўриниб турибди. Воқеалар ривожини кузатишда давом этамиз.

Шуҳратбек Жўраев.