Микель Артета АПЛдан ўйин қайдномасини кенгайтиришни сўради

"Арсенал" бош мураббийи Микель Артета нима учун Англия Премьер-лигасидан ўйин учун қайдномани кенгайтиришни сўраётганини изоҳлади.

— Бизнинг касбимиз ўзига хос: биз инсонлар ҳаётини, фаолиятини ўзгартира оламиз ва бу ажойиб. Лекин ҳар ҳафта кимгадир эртага ишсиз қолишини, ҳатто жамоа билан ўйинга бора олмаслигини айтишга тўғри келади. Айтингчи, яна қайси касбда бундай ҳолат бор?

Мен эртага ошхонага кириб, икки ошпазга: "Бугун сизлар таом тайёрламайсиз, фақат бошқаларни томоша қилиб туринг ёки уйга кета қолинг", деб айта олмайман. Бу оғриқли.

Агар кимдир жараённинг бир қисми бўлишни истаса, у биз билан бирга бўлиши керак. Сафарларга чиқиши, жамоа билан яшаши, ўзини имконият бор деб ҳис қилиши лозим. Агар сен уни қайдномадан четлатсанг, у ўзини етарлича яхши эмасдек ҳис қилади. Чунки қароринг аниқ: унинг кўз ўнгида яна 20 нафар футболчини танлаяпсан. Бу эса мени ташвишга солади.

Қайдномани чеклашдан катта маъно йўқ. Уни кенгайтиришимиз ва барчани ўйиннинг бир қисмига айлантиришимиз керак. Кейин эса ўйин жараёнидан келиб чиқиб тўғри танлов қиламиз. Ўйин вақтини, психологик ва ҳиссий жиҳатларни яхшироқ бошқара оламиз. Бундан ҳамма ютади, — деди "Арсенал' бош мураббийи.