Микель Артета: "Бугун жамоам билан фахрланаман"

"Арсенал" бош мураббийи Микель Артета АПЛ 27-турида "Тоттенхэм Хотспур"га қарши қўлга киритилган йирик ғалаба (4:1) ҳақида фикр билдирди.

"Жуда хурсандман, жамоам билан фахрланаман. Ўйинга қандай тайёргарлик кўрганимиз, қандай ташаббус ва сифат билан бу ерга келиб, айнан шу тарзда ғалаба қозонганимиз – буларнинг барчаси қувонарли. Футболнинг гўзаллиги ҳам шунда.

"Вулверхэмптон"га қарши ўйинни эсласак, ўшанда қандай қилиб дурангни сақлаб қолган эдик? Мен ҳар куни улар биланман ва уларнинг қанчалик катта иштиёқ билан ҳаракат қилишини яхши биламан", – деди Артета.

Виктор Дьёкерешнинг дубли ҳақида

"Бугун у ажойиб ўйнади. Буни ҳар ҳафта кўриб келаётгандик, аммо бугун менинг назаримда у шунчаки беқиёс эди", – деди мураббий Виктор Дьёкереш ҳақида.

Эберечи Эзенинг дубли ҳақида

"Унда ўзига ишонч бор ва мен ундан жуда мамнунман. У биз талаб қилаётган жиҳатларга мослашиш ва жамоага сингиб кетиш учун қаттиқ меҳнат қилмоқда. Бу Премьер-лига, бу ерда ҳаммаси фақат охирида ҳал бўлади, шубҳасиз. Олдинда яна ўнта ўйин бор – бу ҳали жуда узоқ йўл", – деди Артета Эберечи Эзе ҳақида.