Микель Артета "Ливерпуль"га қарши ўйинда жамоасининг ўйинидан норози бўлди

Англия Премьер-лигасининг 36-турида "Арсенал" "Энфилд"да "Ливерпуль" билан 2:2 ҳисобида дуранг ўйнади. Мазкур учрашувдан сўнг испаниялик мутахассис бўлиб ўтган ўйин ҳақида ўз фикрини билдириб ўтди.

— Биринчи бўлимдаги ўйинимиз биз кутадиган даражадан анча паст эди. Бундай давом этиши мумкин эмас. Кейин жамоа яхши жавоб қайтарди — бу зўр, аммо умумий олганда, бу қабул қилиб бўлмайдиган ҳолат. Кубоклар учун курашиш шарт эмас, ғалаба ёки мағлубият бўлиши мумкин. Лекин маълум даражадаги ўйин бўлиши шарт. Ғалабага ҳеч ким кафолат беролмайди. Кейинги мавсумда Чемпионлар лигасига чиқиш учун олти-етти жамоа курашади.

Жамоа бундай ўйнаса, бу — менинг айбим. Бу футболчиларга боғлиқ эмас. Бу — барчамизга боғлиқ. Биз бу стандартларни қабул қилмаслигимиз керак. Бу жуда оғриқли бўлиши лозим. Жорий мавсумда олти марта бир ўйинда бир нафар футболчисиз қолдик. Биз ўз даражамизда ўйнаганимизда нималарга қодир эканлигимизни кўринг, — деди "канонирлар" бош мураббийи "Sky Sports" нашрига берган интервьюсида.