«Милан» ва «Фенербахче» Леау бўйича келиша олмаяпти

«Милан» ҳужумчиси Рафаэл Леаунинг «Фенербахче»га ўтиши бўйича музокаралар ҳозирча натижа бермади. Журналист Ягиз Сабунджуоглу маълумотига кўра, 27 ёшли португалиялик футболчи мавсум учун 12 миллион евро маош талаб қилган, бу миқдор турк клуби учун қабул қилинадиган даражада бўлган.

Асосий келишмовчилик трансфер тўлови атрофида юзага келган. «Милан» дастлаб Леау учун 60 миллион евро сўраган, бу эса «Фенербахче» раҳбариятини мутлақо қониқтирмаган. Кейинчалик италияликлар нархни 50 миллион еврогача туширишга рози бўлди, аммо Истанбул клуби бу таклифни ҳам мақбул деб топмади. Туркия вице-чемпиони 40 миллион евро бермоқчи.

Transfermarkt портали маълумотларига кўра, Рафаэл Леаунинг бозор қиймати 50 миллион евро атрофида баҳоланмоқда. Унинг «Милан» билан амалдаги шартномаси 2028 йил ёзига қадар мўлжалланган.