Миржалол Қосимов: "Қўрқадиган жойи йўқ, "Ал-Иттиҳод"га қарши майдонга тушиш - омад!"

Эртага ОКМК Осиё чемпионлар лигаси доирасида ўз ўйинини ўтказади. Гуруҳ босқич 1-туридан ўрин олган "Ал-Иттиҳод" - ОКМК учрашуви олдидан "кончилар" бош мураббийи Миржалол Қосимов ва клуб сардори Санжар Турсунов матбуот анжуманида иштирок этди. 

Миржалол Қосимов: "Ассалому алайкум, ҳаммага! Ҳар кунгидек тайёргарлик кўрмоқдамиз. Бизни курашларга бой ўйин кутмоқда. Кеча Саудияга учиб келдик, бугун ўйинолди машғулотга чиқамиз. Беллашувга яна бир кун вақтимиз бор. 

Санжар Турсунов: "Ассалому алайкум. Биз одатдагидек тайёргарлик жараёнини ўтказяпмиз. Ғалаба учун майдонга чиқамиз. Учрашув биз учун жуда муҳим аҳамиятга эга. 

Миржалол Қосимов: "Рақибни ҳурмат қилган ҳолда айтишим мумкинки, ҳозир қўрқадиган ёшда эмасман. Биз нафақат "Ал-Иттиҳод"ни, бошқа жамоаларни ҳам ҳурмат қиламиз. Бу футбол, эртага ҳар нарса бўлиши мумкин. 

Рақиб яхши жамоа, чиройли ўйин гувоҳи бўламиз, деб ўйлайман. Бизнинг таркиб ҳам ўзига хос тарзда шаклланган. Нима бўлишини эртага кўрамиз энди. 

Тушуниб турибмиз, эртага йигитлар учун осон баҳс бўлмайди. Саудия клуби сафида Европанинг кўзга кўринган юлдузлари ҳаракат қиляпти. Лекин ютиб бўлмайдиган жамоанинг ўзи йўқ!

Энг кераклиси, биз ўз ўйинимизни кўрсата олишимиз лозим. Қаршимиздагиларнинг ким экани аҳамиятга эга эмас. Ана шунда яхши натижа бўлади, иншааллоҳ. Эртага нима бўлишини ҳозир ҳеч ким айтиб бера олмайди!

"Ал-Иттиҳод"га қарши очиқ футбол ўйнаб бўлмайди. Сабаби, ҳужумда жуда ҳам кучли ва савияли ўйинчилар ҳаракат қилади. Шунинг учун беллашувда ҳам ҳимоя, ҳам ҳужумда бўш ҳудудлар бўлмаслиги керак.

Бир кунда ўйин услубимизни ўзгартира олмаймиз. Муҳими, ҳамжиҳатликда тўп тепишимиз лозим. 

Бу даражадаги кучли клуб билан ўйнаш биз учун омад, албатта. Аввало, гуруҳ босқичига чиққанимизнинг ўзи бир омад. ОКМК халқаро мусобақаларда катта тажрибага эга бўлмаган клуб.

Аммо футбол жамоавий ўйин бўлгани учун ҳам олдиндан ҳеч нарса айтиб бўлмайди. Бир йил олдин Бенземанинг бу ерда ўйнашини ҳеч ким ўйлаб ҳам кўрмаганди. 

Биз ўзимиз завқ оладиган соҳадамиз, бундан футболчилар ҳам ўзига яраша иштиёқ олади. Қўрқадиган жойи йўқ, "Ал-Иттиҳод"га қарши майдонга тушиш - омад!

Мухлисларимиз учун ҳаракат қиламиз. Иккинчи даврада саудияликлар бизнинг стадионга келади. Бизнинг мухлислар жаҳон юлдузларини кўраётганига ҳисса қўшаётганимиздан хурсанд бўламиз, албатта".