Миржалол Қосимов: "Уяладиган жойи йўқ, ишламай ётганимизда бу бошқа нарса эди"

Суперлиганинг 3-турида ОКМК клуби “Сўғдиёна”га қарши майдонга тушди ва унда 2:2 ҳисоби қайд этилди.

Олмалиқликлар қўшиб берилган дақиқаларда ғалабани қўлдан чиқаришди ва ғалабасиз сериясини давом эттиришди.

Учрашувдан сўнг ОКМК бош мураббийи Миржалол Қосимов одатдагидек матбуот анжуманида қатнашди.

- Ҳар доим “Сўғдиёна” билан қизиқарли ўйин бўлади. Бу сафар ҳам шунақа тарзда ўтди. Ўзимни жамоамга келадиган бўлсак, оддий голларни ўтказиб юбордик. 45-дақиқада кутилмаганда Дориевнинг зарбасидан кейин гол бўлди. Иккинчисида ҳам шошилмаслик керак эди. Кўрсатмаларда ҳам айтилганди. Қарши ҳужумда иккинчи голни ҳам ўтказиб юбордик. Албатта, биринчи бўлим охирида ва иккинчи бўлим якунида голлар ўтказиб юбориш ачинарли. Лекин биринчи бўлимга қараганда, иккинчи бўлимда шижоатроқ ўйнадик ҳамда ҳисобда олдинга чиқдик. Ҳисобни ушлаб қолиш керак эди. Насиб шу экан, энди кейинги учрашувларга янада яхшироқ тайёргарлик кўриб, ғалаба қозонишга ҳаракат қиламиз.

- ОКМК учун учта ўйинда бир очко олиш уятли натижа ҳисобланмайдими?

- Уятли? Биз ҳам ўзимизга-ўзимиз душман эмасмиз. Ҳозирги кунда шу натижалар бизда ҳам, “Сўғдиёна”да ҳам кутилмаган эди. Худо хоҳласа, ўзимизда куч топиб ҳаракат қиламиз. Бу баҳона эмас. Аммо савияли бўлган 13 нафар футболчи жамоани тарк этди. Бир кунда қуриб бўлмайди, гапириш осон. Ҳамма нарсага вақт керак. Албатта, бу бизни ўрнимиз эмас. Спорт принципи курашиш, ютқазишни ёқтирмайман. Бундан ҳам қийин вазиятлардан чиқиб кетганмиз. Ҳали чемпионатимиз узун. Энг кераклиги йигитларда шижоат бор. Мазмунсиз ўйин бўлса ундан ёмони йўқ. Албатта, уятли, бироқ уяладиган жойи йўқ. Агар ишламай ётганимизда бу бошқа нарса эди.

- Бу сафар ОКМК олдинги учрашувларга қараганда сермаҳсулроқ ҳаракат қилди. “Бунёдкор” ва “Хоразм”га қарши айнан вазиятлардан фойдалана олмаслик панд берганди. Бу сафар иккита гол урди. Бу ўйинларда қайси жиҳатларни эътироф этган бўлардингиз ва яна қайси жиҳатлар устида ишлаш керак, деб ўйлайсиз?

- Биринчиси барибир имкониятлардан фойдалана олмаслик. Иккинчи бўлимда қўл силтаб ўйнамаслик ҳам мумкин, кайфиятга таъсир қилиши ҳеч гап эмас, чунки ҳаммани руҳияти ҳар хил. Олдинги ўйинларда ҳам гол ўтказгач, ўйин тизгинини қўлга олиб гол уришга ҳаракат қилгандик. Иккинчиси шижоат. Албатта, хатолар бўлади, ҳаммамиз хато қиламиз. Беайб Парвардигор.

- Охирги пайтларда ОКМКни трансфер сиёсаси ўзгарди, етакчилар кетди, таркиб ёшартирилди. Бу эса клубни совриндорлар қаторидан ўртамиёналар орасига тушириб қўйиш бўйича хавотир йўқми?

- Албатта, бу ҳам бир малака. Бундай бўлишини хоҳламаймиз. Мақсад бўлиши керак. Эскиларни гапи бор: осилсанг баланд дорга осил. Шунга яраша қилинаётган меҳнат ўз самарасини бериши керак. Нима бўлганда ҳам олдинга интиламиз, бусиз иложи йўқ. Аммо бу йил мана бундай учрашувларда ютқазмаслигимиз керак. Қаердадир тўпларни ўтказиб юбормаслик даркор. Юқори ўринни олиш учун ғалаба қозониш керак.

- Бир кун келиб ОКМКни тарк этганингизда ва ортга қараганингизда клубни чемпион қила олмадим, деган армон сизни қийнамайдими?

- (Кулади) Ҳозир шу гапни йигитларга ҳам гапирдим. Тушунтиришга ҳаракат қилдим, хулоса чиқаринглар дедим. Биз ҳам футболда бир пайтлари кимнидир ўрнига келганмиз. Бизни ўрнимизга ҳам келишган, чархпалак тўхтаб қолмайди. Бироқ Аллоҳ томонидан шунақа вақт берилган, шуни мазмунли ўтказиш керак. Футболда ҳам худди шунақа. Иложи борича тушунтиришга ҳаракат қилдим. Армон - менда жаҳон чемпионати бўлган. Худога шукр, терма жамоамиз чиқди. Бировни чўнтагига қараб яшамайман. Кўрпангга қараб оёқ узат дейишади. Кимнидир гапириши мумкин, лекин бу гаплар биздан олдин ҳам бўлган, биздан кейин ҳам бўлади. Қўрқадиган, уяладиган жойим йўқ. Мен келгунимча Олмалиқда болалар спортини ривожлантириш ҳеч кимга қизиқ бўлмаган. Академия очилди, қандайдир қадам ташланди. Мақтаниш эмас, лекин шу нарса шу ерда қолади, мен кўтариб олиб кетмайман. Худо хоҳласа, кичкина ҳажмдаги ишлар қилингани йўқ. Раҳбариятга ҳам катта раҳмат. Битта дарахт эксанг эртага уни соясида кимдир ўтиради, ўзинг ўтирмайсан. Тилни суяги йўқ, гапираверишади, майли мени гуноҳларим тўкилади. Биз ҳам қаердадир хато қилгандирмиз. Эртага шу ердан чиққан йигитлар юртимиз шаънини ҳимоя қилишади, деб ният қилиб қоламан. Ҳамма нарсага сабр. Битта гапим бор: йўлда кўриб қолганман, ҳаётий, дамасни орқасига ёзиб олибди: “бир гап бўлар, қайси бири сиқилай”.