Modrich "Real"ning haqiqiy faxriysi bo‘ldi!

Madridning “Real” klubi yarim himoyachisi Luka Modrich “Los-Blankos” tarixidagi eng keksa futbolchiga aylandi. U 39 yoshu 40 kunligida maydonga tushdi. Bu haqda insayder Fabritsio Romano X (sobiq Twitter) ijtimoiy tarmog‘ida xabar berdi.

Kecha Ispaniya La Ligasining 10-turidan o‘rin olgan “Selta”ga (2:1) qarshi bahsning 63-daqiqasida xorvatiyalik futbolchi zaxiradan maydonga tushdi va oradan 3 daqiqa o‘tib golli uzatmani amalga oshirdi. "Real" safida gollarni Vinisius Junior va Kilian Mbappe kiritdi. “Selta”ning javob golini esa yarim himoyachisi Villot Svedberg urdi.

Shu tariqa Modrich afsonaviy Ferents Pushkashning rekordini yangiladi. Vengriyalik futbolchi "qirollik klubi" safidagi so‘nggi o‘yinini 1966 yilda o‘tkazgan. O‘shanda u 39 yoshu 36 kunlik edi.

La Liganing joriy mavsumida Modrich barcha musobaqalarda 10ta o‘yinda qatnashib, ikkita golli uzatmani amalga oshirdi. Uning "Real" bilan amaldagi mehnat shartnomasi 2025 yilning yoziga qadar imzolangan. Transfermarkt portalida berilgan ma’lumotlarga ko‘ra, futbolchining bozor qiymati 6 million evroni tashkil qiladi.