"Монако", "Севилья" ёки "РБ Лейпциг! Шомуродов учун кейинги манзил қайси чемпионат?

Яқиндагина Италия нашрлари томонидан Римнинг "Рома" клуби ёзда трансферга қўйиши кутилаётган футболчилар рўйхати эълон қилинди. Афсуски, улар орасида ҳамюртимиз Элдор Шомуродов ҳам бор. Агар маълумот тўғри бўлиб чиқса, Элдор келаси мавсумни бошқа жамоа сафида бошлаши мумкин. Хўш, кучли бешликдаги қайси чемпионат "Рома" аъзоси учун энг мақбул вариант бўла олади? Бугун шу борасида фикр алмашамиз.

А Серия - жонажон ўлка

Вариантлар: "Фиорентина", "Торино".

Шома Италияга кўчиб ўтгач, "Женоа"да яхши мавсум ўтказди. Кейин "Рома"даги Абрахам билан рақобат уни захирага "михлаб" қўйгани рост. Хўш, Элдор Шомуродов учун Италияда қолиш қай даражада тўғри танлов? Катта эҳтимол билан, бу вазиятдан чиқиб кетиш учун яхши ечим, аммо Римдан кетиши шарт. Ортда қолаётган мавсумни ҳамюртимиз деярли захира ўриндиғида ўтказиб юборди. Тошкентдаги йиғин чоғида берган интервьюсида эса, агар вазият ўзгармаса, бошқа вариантларни ҳам кўриб чиқиши мумкинлиги ҳақида фикр билдирди. Унинг бунга тўлиқ ҳаққи бор. Бундай разм солиб қаралса, Италия А Серияси Элдор учун анча қулай. Тезлиги юқори ва иккинчи қаватдаги курашлардан қочмайдиган легионеримиз лигадаги исталган ўртамиёна клубда фаолиятини давом эттириши мумкин.

"Фиорентина" ёки "Торино" сингари жамоалар Элдорга жуда мос келади. Боз устига, Италия иқлими, одамларининг менталитети ва тил борасидаги муаммоларни эндигина енгиб ўтган Шома учун Апеннин яриморолида қолиш энг маъқул йўлдек кўринмоқда. Агар ҳужумкор футболни тарғиб этувчи клуб бўлса, нур устига аъло нур! Элдор янада кўпроқ ўзини кўрсатиши ва яна гол+пас тизимида 15 очкодан кўпроқ жамғариши мумкин. Агар А Серияда жон сақлаб қолиш илинжидаги жамоалардан таклиф тушса, бошқа лигага йўл олиш борасида бош қотиришга тўғри келади. Ҳар бир ўйинда ўртача 1 ёки 2 та голли вазият яратишгагина қодир бўлган клублар сафида янада омма эътиборидан четда қолиш хавфи мавжуд.

Лига 1 - енгил, аммо мақсаддан узоқ лига

Вариантлар: "Монако", "Марсель".

Кучли бешликнинг 5-ўриндаги биринчилиги. Қишда Элдорни айнан шу лига вакили саналган "Монако"га кўчиб ўтиши борасида гап-сўзлар пайдо бўлгани ёдингиздами? Айнан шу миш-миш борасида Дубай шаҳрида терма жамоа йиғинида бўлиб турган Элдорга савол берганимда, у ҳозир "Рома" аъзоси эканлигини пеш қилиб саволдан қочган, аммо бу ҳақида гап ҳақиқатан борлигини рад этмаган эди. Хўш, Месси ва Неймар сингари йигитлар тўп тепаётган Лига 1 термамиз сардорига нима бера олади? Биринчи навбатда эркинлик! А Сериядан фарқли ўлароқ, бу ерда тактик кўрсатмалар биринчи планга кўтарилмайди. Францияда индивидуал маҳорати юқори бўлган ижрочилар қадрланади. Элдор тезкор ва жисмонан бақувват бўлгани боис, техникага суянадиган футболчилар орасида йўқолиб қолмаслиги аниқ. Афсуски, барчаси биз ўйлагандек осон эмас. Кўплаб юлдузлар Франциядан кучли бешликнинг бошқа лигаларига йўл олади. Элдор эса, Италиядан бу ерга келиши карьерасида ортга ташланган қадамдек кўриниши мумкин. Бу аччиқ бўлса-да ҳақиқат. А Серияда 10 та гол киритган футболчи Лига 1да 20 бор ўз номини таблога ёздирган форварддан кўра грандлар эътиборига тезроқ тушиши рост.

Шундай бўлсада, Элдор учун Франция биринчилиги ўз кучига ишончни қайтариб олиш учун ёмон танлов эмас. Асосийси, қисқароқ муддатли шартнома имзолаб, тезроқ элитага қайтиш учун ҳаракат қилиш лозим. Акс ҳолда, Лига 1дан сўнг бирорта гранд клуб Шомуродов учун 10-15 миллион евро сарфлаши ҳақиқатдан йироқ бўлиб бораверади.

Испания - янги саргузаштлар сари олға!

Вариантлар: "Севилья", "Вильярреал", "Сельта".

Ла Лига ўзининг шиддати билан ажралиб туради. Бу ерда ижрочилар класси ўртасидаги фарқ таблодаги натижага таъсир кўрсатиши бир неча 10 йиллардан бери исботини топмоқда. Испанияда жамоавий ўйин кўпинча иккинчи даражага тушиб қолади.

Шу боис, Ла Лигада ўзини кўрсатиш бошқа лигалардан кўра осонроқ. Айнан шу важ сабабли АПЛ клубларининг асосий эътибори айнан шу лигада порлаган юлдузчаларга қаратилади. "Монако" билан биргаликда Андалусия клуби ҳам Элдор хизматига қизиқиб қолгани ҳақидаги хабарлар хориж ОАВ томонидан кенг ёритилди. Майли, "Севилья" ўз йўлига. Ла Лига ватандошимизни қайтадан кашф этиш имконини яратиши мумкин. А Сериядан фарқли ўлароқ, тактик кўникмадан кўра, тезкорликни афзал кўрадиган биринчиликда "Рома" аъзоси ўзини енгилроқ ҳис қилиши мумкин. Иқлим борасида ҳам Испания анча иссиқ. "Реал", "Барселона", "Атлетико", "Вильярреал" сингари жамоалар жаҳон футболидаги трендда бўлган элементлардан фойдаланади. Испаниянинг исталган жамоасида Элдор А Сериядаги юкламалардан озод бўлиб, эркинроқ тўп тепиши мумкин.

Германия - жисмоний тайёргарликни синовдан ўтказиш учун имкон

Вариантлар: "Лейпциг", "Хоффенхайм", "Айнтрахт", "Герта".

Бундеслига бу - фаолиятини янги даражага олиб чиқиш ниятида бўлган ёш футболчилар учун супер имконият. "Манчестер Сити"га кераксиз бўлиб қолган Жэйдон Санчо, "Боруссия" Дортмундда порлаган Эрлинг Холанд ва бошқа кўплаб мисолларни келтириш мумкин. Жозиба борасида қолган лигалардан ортда боришига қарамай, Бундеслига футболчиларни яширин қирраларини очиб бериш хусусиятига эга. Биринчи навбатда жисмоний тайёргарлик талаб этиладиган лига ҳақида гап борар экан, Элдор Шомуродов у ерда йўқолиб қолмаслигига шубҳамиз йўқ. Иккинчи қаватдаги фаоллиги, меҳнатдан қочмаслиги ва жанжаллардан узоқлиги боис, унинг ўйини Германияда очилиб кетиши эҳтимоли юқори. Тақдим этилаётган вариантлар орасида Олмония клублари энг муносиб танловдек кўринмоқда. Ортиқча босимсиз, тизим асосида шаклланган ўйин услубига мослашиш анча осонроқ.

Жозе Моуриньо бутун мавсум давомида деярли 6 хил тактикадан фойдаланади. Элдор эса, улардан ҳеч бирига тўғри келмади. Бундеслига клублари трансфер ойнасида бошқачароқ ишлайди. Улар ўз услубига мос тушадиган футболчиларгагина мурожаат этади. Агар, "Лейпциг" ёки "Хоффенхайм"дан бири таклиф билан чиқса, Элдор дарров жомадонларини йиғиштириб, йўлга отланиши керак. Бу бироз секинлашган карьераси учун олдинга ташланган қадам бўлиши аниқ. Ҳар ҳолда, машғулотларда бор кучи билан ишлашга ўрганган "Шома"ни меҳнатини у ерда қадрлашлари аниқ.

АПЛ - ҳозирча орзу, аммо...

"Рома" заҳирадасида қолиб кетган форвард билан инглиз клублари қизиқиб қолиши мушкул вазифа. Қайсидир маънода ҳозир буни имкони йўқлиги факт. Шунга қарамай, ҳали барчаси йўқотилгани йўқ. Элдор дунёнинг биринчи рақамли лигасида тўп тепиши учун камида битта ажойиб мавсум ўтказиши шарт. Бу қайси жамоа сафида бўлишига қарамай, у кучли бешликда бўлиши керак. Бир неча йил аввал "Бунёдкор" сафида тўп тепиб юрган уятчанг йигитни "Рома" аъзоси бўлиши ўша пайтлари қанчалар ҳақиқатдан йироқ бўлиб эшитилган эди. Элдорнинг имкониятларидан келиб чиқсак, у ҳозир ҳам АПЛ клубларидан бирида ўйнашга қодир.

Афсуски, ортда қолаётган мавсум уни анча руҳан синовдан ўтказди. Катта умидлар билан Римга кўчиб ўтди. Аввалига асосий таркибда, кейин тўлиқ захирага ўтказилди. Терма жамоа ЖЧ йўлланмасини бой берди. Нафақат италиялик, балки маҳаллий мухлислар ҳам унинг имкониятларига шубҳа билан қарашни бошлади. Жуда кўп танқид қилинди. Ҳозир, босим устига яна босим бўлмаслиги учун ҳам нисбатан кучсизроқ жамоада бир ё икки мавсум тўп суриш ҳаммасини ўз ўрнига қайтариши мумкин. Ҳозирча, бир қадам ортга ташлаш, келажакда барча тўсиқларни бир ҳатлаб ортда қолдириш имконини беради.

Сизнингча, Элдор Шомуродов кучли бешликнинг қайси лигасида фаолиятини давом эттириши керак? Фикрингизни изоҳларда қолдиринг!