"Монако" ҳужумчисини Россияга чорлашмоқда

"Монако" ҳужумчиси Генри Оньекуру фаолиятини Россия премьер-лигасида давом эттириши мумкин.

Milli Gazete нашрининг маълум қилишича, 23 ёшли  нигериялик футболчига ЦСКА харидор бўлмоқда. Москваликлар уни жорий қишки трансферлар даврида таркибга қўшиб олишни кўзламоқда.

Генрига даъвогарлар қаторида "Галатасарой" ҳам бор. Турк гранди унинг учун бегона эмас. Боиси, Оньекуру ўтган мавсумнинг иккинчи ярмини айнан шу “Галатасарой”да ижарада ўтказган эди.

Оньекуру жорий мавсум “Монако” сафида бор йўғи 4 та ўйинда майдонга тушди ва 1 та голга ассистентлик қилди. Унинг клуб билан амалдаги шартномаси 2024 йилга қадар имзоланган.