Европалик мураббий мундиалда уч ўзбек футболчисини алоҳида ажратиб кўрсатди
Тожикистоннинг “Хўжанд” клуби бош мураббийи сифатида ишлаётган сербиялик мутахассис Милан Миланович Eurasia Football нашрига берган интервьюсида Ўзбекистон миллий терма жамоасининг 2026 йилги жаҳон чемпионатидаги иштирокини баҳолади.
Бу мутахассис минтақа футболини яхши билади. Тожикистонга келгунга қадар Қозоғистон чемпионатида “Тобол” ва “Иртиш” жамоаларида фаолият юритган.
Милан Милановичнинг фикрича, Ўзбекистон терма жамоаси ўзи учун тарихий илк жаҳон чемпионатида бундан ҳам яхшироқ натижага эришиши мумкин эди, аммо футболчиларга бундай йирик мусобақаларда иштирок этиш тажрибаси етишмади.
- Аввало, Ўзбекистон миллий терма жамоасига тажриба етишмади. Жамоа мундиалда бундан ҳам яхшироқ иштирок этиши мумкин эди, аммо жаҳон чемпионати шундай мусобақаки, унда ҳар бир хато ҳал қилувчи аҳамиятга эга бўлади. Футболчиларнинг аксарияти учун бу бундай юқори даражали мусобақадаги илк тажриба эди, - деди Милан Миланович.
Европалик мутахассис мундиалда ўз салоҳиятини намойиш қила олган Ўзбекистон миллий терма жамоасининг бир неча футболчиларини алоҳида эътироф этди.
- Мен, айниқса, Аббосбек Файзуллаев, Элдор Шомуродов ва ёш футболчи Беҳруз Каримовни ажратиб кўрсатган бўлардим. Улар жаҳон чемпионатида энг ёрқин ўйин намойиш қилди.
Каримов яхши салоҳиятга эга эканини кўрсатди. Ёш футболчи учун жаҳон чемпионатида қатнашишнинг ўзиёқ фаолиятидаги жуда муҳим босқич ҳисобланади, - дея қўшимча қилди сербиялик мураббий.
Миланович мухлисларни Ўзбекистон терма жамоаси натижасини муваффақиятсизлик сифатида қабул қилмасликка чақирди. Унинг таъкидлашича, жаҳон чемпионатида иштирок этишнинг ўзи келажакда ўзбек футболи ривожи учун мустаҳкам пойдевор бўлиб хизмат қилади.
- Натижа сабабли хафа бўлиш керак эмас. Бу Ўзбекистон учун илк жаҳон чемпионати эди ва мусобақага чиқишнинг ўзи катта ютуқ ҳисобланади. Жамоа келажакда асқотадиган бебаҳо тажриба орттирди. Энди энг муҳими – иштирокни тўғри таҳлил қилиш ва ишлашда давом этиш. Бу авлоднинг келажаги бор, - дея хулоса қилди Милан Миланович.
Фикрлар