Моуриньо истаган ўйинчини олишини ва нарх уни қизиқтирмаслигини уқтирди

Мадриднинг «Реал» жамоаси бош мураббийи Жозе Моуриньо Кот-д’Ивуар терма жамоаси ярим ҳимоячиси, вингер Ян Диоманденинг клубга қўшилиши юзасидан фикр билдирди.

«Мен ҳеч кимни талаб қилмаганман. Жамоага келганимда, таркибни синчиклаб ўрганиб, нимани ўзгартириш кераклигини тушунган ҳолда иш бошладим. Лекин ўтган мавсумда бўлиб ўтган воқеалардан сўнг кўп нарсани билиб олишни, бироқ ўзимни гўё ҳеч нарсадан хабардор эмасдек тутишни истадим.

Иккала қанотда ҳам ўйнай оладиган, тезкор ва ҳужумкор фланг ўйинчисини топиш осон эмас. У 120, 80 ёки 20 миллион турадими — бу ҳақда баҳслашишни истамайман. Мен учун асосийси — у жамоамга нима бера олиши. Шуни ўйлаб, «ҳа, мен уни истайман», дедим. Қолгани — унинг қанча тураётгани — менинг ишим эмас», — дея Моуриньонинг сўзларини келтиради Marca нашри.

Ян Диоманденинг Германиянинг «РБ Лейпциг» клубидан мадридлик «Реал» сафига ўтиши испан гранди тарихидаги энг қиммат трансфер сифатида қайд этилди. ОАВ хабарларига кўра, «Қироллик клуби» ивуарлик футболчи учун 140 миллион евро тўлаган, шундан 15 миллион евро бонуслардан иборат.