Моуриньо: "Реал"дан ўз хоҳишим билан кетган кам сонли мураббийларданман"

"Бенфика" бош мураббийи Жозе Моуриньо "Реал"га қарши ўйин олдидан Мадрид клубидан кетиши ҳақида фикр билдирди.

Жамоалар Чемпионлар лигаси 1/8 финалига чиқиш учун плей-офф ўйинларида ўзаро тўқнаш келади. Моуриньо сўзларига кўра, у "Реал" президенти Флорентино Перес билан илиқ муносабатларни сақлаб қолган.

"Охирги марта биз "Бенфика" билан шартнома имзолаганимда гаплашдик ва у мени табриклади. Умид қиламан, эртага у ўйинга келади. Бизнинг ажойиб дўстлигимиз бор ва буни яшириш керак эмас.

Мен кетаётганимда президент ва бош директор Хосе Анхель Санчес шундай деганди: мен жамоа учун энг оғир ишларни бажариб бўлган пайтимда, яхши ва енгил давр бошланаётган вақтда кетаяпман. Аммо мен оиламни биринчи ўринга қўйдим ва кетиш вақти келди, деб ўйладим. Аввалига осон бўлмади, лекин кейинги ютуқлар — менинг эмас, балки жамоада қолган инсонларнинг хизмати.

Мен “Реал”ни ишдан бўшатилмай, ўз хоҳишим билан тарк этган кам сонли мураббийлардан бириман. Агар инсон ўз ихтиёри билан кетса, у пок виждон билан кетади", — деди Моуриньо.