Шомуродов ва Файзуллаев жамоаси Марказий Осиёдан яна бир ўйинчини сўради
Ўзбекистон миллий терма жамоаси етакчилари Элдор Шомуродов ва Аббосбек Файўуллаев клублар миқёсида Туркия Суперлигасида “Истанбул Башакшеҳир” шарафини муносиб ҳимоя қилаётгани боис, Марказий Осиёдаги футбол ишқибозлари бу жамоа ўйинларини кузатиб бормоқда.
Ўз навбатида, Истанбул клуби мутасаддилари ва скаутлари ҳам ушбу минтақа футболчиларига эътибор қарата бошлади.
Қозоғистон футболи манбаларининг маълум қилишича, “Истанбул Башакшеҳир” футбол клуби “Ордабаси” жамоасининг 19 ёшли ҳужумчиси Жасулан Амирни сотиб олиш истагини билдирган.
Иқтидорли ўйинчи трансфери бўйича тушган таклифлар ҳақида “Ордабаси” президенти Дархан Қизайбаев ўз фикр-мулоҳазаларини ва позициясини билдирди.
- Жасулан Амир бўйича жуда кўп таклифлар бор. Клубни ҳам, футболчини ҳам қониқтирадиган таклиф келса, биз уни албатта қабул қиламиз.
Хусусан, ҳозиргача Амир бўйича Россиянинг “Балтика” ва Туркиянинг “Истанбул Башакшеҳир” клублари аниқ таклиф билан чиқди.
Биз Жасуланнинг жамоамизга чемпионликни қўлга киритишда ёрдам беришини хоҳлаймиз. Агар чемпион бўлсак, келаси йили УЕФА Чемпионлар лигасида иштирок этамиз. Шундан кейин футболчининг ўзи келажаги бўйича қарор қабул қилади, - деди Қизайбаев.
Жорий Қозоғистон Премьер-лигаси мавсумида Жасулан Амир 17 та учрашувда майдонга тушиб, 7 та гол урди ва 2 та голли узатмани амалга оширди.
Шунингдек, у июнь ойида Арманистон ва Венгрияга қарши ўртоқлик учрашувларида иштирок этиб, Қозоғистон миллий терма жамоаси сафида дебют қилди.
Қозоғистон Премьер-лигасининг 17-туридан кейин “Ордабаси” 40 очко билан мусобақа жадвалида пешқадамлик қилмоқда.
Элдор Шомуродов ва Аббосбек Файзуллаев “Истанбул Башакшеҳир”нинг етакчи ўйинчилари ҳисобланади. Элдор ўтган мавсум истанбулликлар сафида Туркия чемпионатида 34 та учрашувда иштирок этиб, 22 та тўп киритди ва Суперлига тўпурари бўлди.
Аббосбек Файзуллаев эса, Туркия Суперлигасида 20 та учрашувда рақиблар дарвозасини уч маротаба ишғол қилиб, дебют мавсумини анча муваффақиятли ўтказди.
Фикрлар