Муҳаммадкарим Тоиров: "Ўзбекистон Кубоги финали олдидан мухлисларимизни хурсанд қиламиз"

“Андижон” клуби Суперлиганинг 19-турида Жиззахда “Сўғдиёна”га қарши учрашувда 1:1 ҳисобида дуранг натижа қайд этганидан хабардорсиз.

Ушбу баҳсда “Бургутлар” таркибида асосий таркибда майдонга тушган ва учрашувни тўлиқ ўтказган иқтидорли ярим ҳимоячи Муҳаммадкарим Тоиров баҳс мобайнида тинмади ҳамда фаол ўйин намойиш қилди. Шунинг учун ҳам у учрашувнинг энг яхши футболчисига айланди.

Тоиров мазкур беллашувдан кейин “Андижон” матбуот хизмати учун интервью берди.

- Муҳаммадкарим, Жиззахдаги ўйин қандай таассурот қолдирди?

- Ушбу учрашувга тўхталадиган бўлсам, беллашув ғоят қизиқарли ва жанговар тарзда ўтди. Иккала жамоа ғалаба учун ўйнади. Майдонда ҳамма борини берди.

- “Андижон” бу баҳсда мардонавор курашиб, характер кўрсатди ва ғалаба қозонишга ҳам жуда яқин эди. Сизнингча, нима етишмади, деб ўйлайсиз?

- Ҳа, ғалабага бўлган иштиёқимиз юқори эди. Кўриб турганингиздек, ҳар бир учрашувимиз биз учун финалга тенг ўйин бўлмоқда ва ҳар бир баҳсда ғалаба учун майдонга тушяпмиз. “Сўғдиёна”га қарши учрашувда ҳам биз фақат ғалаба учун боримизни бердик. Ўзингиз айтганингиздек, жамоамиз ғалаба қозонишга жуда яқин эди. Демак, жамоамиз аввалги ҳолатига қайтяпти. “Бургутлар”ни ғалаба учун иштиёқи юқори.

- Учрашувнинг энг яхши футболчисига айландингиз. Буни кутганмидингиз ва ўзингизга қолса, энг яхши ўйинчи ким бўлди?

- Учрашувни энг яхши футболчиси бўлиш бу ёқимли, албатта. Қайси ҳолатдаки, жамоа ютуққа эришган пайти уч очкони қўлга киритганида ёқимли деб ўйлайман. Тўғриси, бу нарса мени ҳаёлимга ҳам келмаганди. Юқорида айтганимдек, ҳамма тер тўкди, меҳнат қилди. Мен кимнидир алоҳида айта олмайман.

- Олдинда “Нефтчи”га қарши водий дербиси кутмоқда. Бўлажак дерби олдидан нималарни айта оласиз?

- Биз “Нефтчи” билан бўладиган водий дербисида мухлисларимиз учун майдонга тушамиз ва мураббийларимизнинг кўрсатмалари бўйича ўйин олиб борамиз. Худо хоҳласа, ғалаба қозонамиз. Бизга ишонч билдириб қўллаб-қувватлаётган мухлисларимизни Ўзбекистон Кубоги финали олдидан хурсанд қиламиз.